Nature Trust Malta Gozo Section kitbu fuq il-midja soċjali tagħhom dwar żewġ qniefed żgħar li ġew salvati f’Għawdex matul il-ġimgħa li għaddiet. Kenuna nstabet in-Nadur, viċin it-Torri tal-Kenuna, filwaqt li Dobbie nstab fl-Għarb. It-tnejn kienu jiżnu inqas minn 60 gramma u għalhekk kienu għadhom żgħar wisq biex jitħallew waħedhom fis-selvaġġ.
Għalkemm instabu separati, ma damux wisq waħedhom hekk kif Kenuna u Dobbie malajr marru sew flimkien. Nature Trust Malta spjegaw li ż-żewġ qniefed diġà saru ħbieb kbar u issa qed iżommu kumpanija lil xulxin waqt li jkomplu jikbru u jissaħħu.
Għalissa, Kenuna u Dobbie se jibqgħu taħt il-kura tal-voluntiera sakemm ikunu ta' piż akbar u jkunu b’saħħithom biżżejjed biex jerġgħu jibdew jgħixu b’mod indipendenti fis-selvaġġ.
Jekk wieħed jiltaqa’ ma’ annimal selvaġġ ferut jew fil-periklu, jista’ jikkuntattja lill-Wildlife Rescue Team Malta fuq in-numru 99999505.
Iċ-ċentru ta’ riabilitazzjoni tagħhom fix-Xrobb l-Għaġin huwa miftuħ ukoll għall-pubbliku, fejn wieħed jista’ jara wħud mill-annimali li jkunu qed jingħataw il-kura, fosthom fkieren tal-baħar u qniefed. Id-dħul huwa b’xejn, għalkemm id-donazzjonijiet huma apprezzati, iżda wieħed irid jibbukkja minn qabel billi jikkuntattja lil [email protected].
