Palazzo Parisio fin-Naxxar qasam storja mill-passat tiegħu li tispjega kif mument ta’ niket spiċċa, b’mod mhux intenzjonat, biex għen fil-preservazzjoni ta’ dan il-palazz. Fuq il-paġna tiegħu, Palazzo Parisio rrakkonta l-istorja ta’ karru li kien jagħmel il-vjaġġ bejn In-Naxxar u l-bank ta’ Giuseppe Scicluna fi Triq l-Ifran, il-Belt Valletta, għal għadd kbir ta’ drabi.
Kien fl-4 ta’ Frar tal-1907 meta l-Markiż irritorna lura d-dar wara vjaġġ bil-karru. Hu wasal iħossu ma jiflaħx u miet ftit tal-ħin wara, fl-età ta’ 52 sena. Wara mewtu, martu Corinna u ibnu John telqu minn Palazzo Parisio u marru jgħixu fi proprjetà oħra fin-Naxxar kif ukoll fid-Dragonara Palace. Il-palazz, li kien diġà abitat iżda kien għadu mhux kompletament lest, ingħalaq.
Dettall partikolari huwa li l-purtieri kienu għadhom lanqas biss ġew imdendla. Ħadd ma rritorna biex itemm ix-xogħol li kien għad fadal fil-palazz. Iżda proprju dan l-istat mhux mitmum spiċċa biex sar wieħed mill-akbar fatturi li għenu biex il-post jinżamm kif kien.
“Dak li jilqagħkom illum ġie ppreservat minħabba tmiem, mhux minħabba pjan,” kiteb Palazzo Parisio. Storja li turi kif, xi drabi, il-postijiet storiċi li ngawdu llum ma jkunux ġew ippreservati b’deċiżjoni maħsuba minn qabel, iżda minħabba ċirkostanzi mhux mistennija li bidlu l-kors tal-istorja.
Facebook / Palazzo Parisio
