“Ma, kieku bħal lum kont tagħlaq sninek!”, b’dawn il-kelmiet mimlijin emozzjoni, il-Kunsilliera Yana Borg Debono Grech sellmet it-tifkira ta’ ommha f’jum li kellu jkun wieħed ta’ ċelebrazzjoni.
F’messaġġ qasir iżda profond li qasmet pubblikament, Yana kitbet, “Ma, kieku bħal lum kont tagħlaq sninek! Inħossok miegħi kuljum bħal anġlu kustodju. Nimmisja l-pariri tiegħek! Inħobbok.” Kliem li juri kemm ir-rabta bejn omm u tifla tibqa’ soda u ħajja anke wara t-telfa.+
Ommha hi l-mibkija Joanna Debono Grech, li serviet bħala eks-sindku ta’ Birkirkara u ħalliet marka importanti fil-ħajja politika u soċjali tal-lokalità. Il-ħidma tagħha kienet apprezzata minn bosta, u t-telfa tagħha ħalliet vojt kbir mhux biss fil-familja tagħha iżda wkoll fil-komunità li tant ħadmet għaliha.
Joanna kienet ukoll it-tifla tal-eks Ministru Joe Debono Grech, figura magħrufa fix-xena politika Maltija. Il-wirt ta’ servizz pubbliku jidher li baqa’ jgħaddi minn ġenerazzjoni għal oħra, b’Yana wkoll timpenja ruħha fil-ħidma tagħha bħala kunsilliera.
Il-messaġġ ta’ Yana jfakkarna kemm il-memorja ta’ dawk li nħobbu tibqa’ tgħix fina, fil-pariri li tawna, fil-valuri li għallmuna u fil-preżenza siekta li nħossu f’kull pass li nagħmlu. Jum li suppost kien ta’ ferħ inbidel f’mument ta’ tifkira, iżda wkoll ta’ gratitudni lejn omm li tibqa’ anġlu kustodju għal bintha.
Facebook / Yana Borg Debono Grech
