Omm qed tappella għall-għajnuna finanzjarja biex bintha ta’ sitt snin tkun tista’ tibqa’ tattendi l-iskola f’Malta fejn bdiet tissetilja u tħossha sigura.
L-appell permezz ta’ GoFundMe għandu l-għan li jkopri wkoll l-ispejjeż tat-terapija okkupazzjonali u ta’ persuna li ser tieħu ħsieb lit-tifla regolarment fix-xahar ta’ Marzu.
L-omm spjegat li l-iskola kienet ta’ għajnuna kbira għal bintha u li bħalissa qed torganizza appoġġ addizzjonali biex tindirizza l-bżonnijiet tagħha. Għaldaqstant, bidla fl-iskola f’nofs is-sena skolastika tista’ tkun ta’ detriment għall-progress li għamlet, speċjalment issa li bdiet issib ambjent fejn tħossha komda u sigura.
It-tifla twieldet bi problemi fil-vista u kienet irċeviet kura fl-Irlanda. Għalkemm ommha kienet taħseb li dik il-fażi kienet intemmet, issa hemm bżonn li terġa’ tmur l-Irlanda għal aktar kura relatata mal-għajnejn.
Minn meta bdiet tgħix Malta u tattendi l-iskola, ommha ndunat ukoll li bintha taffaċċja diversi diffikultajiet fil-ħajja ta’ kuljum.
Fost dawn hemm problemi waqt l-ikel u sensittività għall-ħsejjes ta’ kuljum, li xi drabi jwassluha biex tħossha maħkuma u jkollha bżonn ħafna ħin biex terġa’ tikkalma.
It-tifla għandha dijanjosi kkonfermata. Minkejja l-isfidi, tiddeskriviha bħala tifla intelliġenti, kapaċi u mimlija ħajja, b’daħka li tiġbdek u personalità soda.
Minbarra l-isfidi ta’ bintha, l-omm qed taffaċċja wkoll diffikultajiet personali. Hi tgħix b’kundizzjoni kronika tal-qalb li, minħabba l-pressjoni u l-istress tal-aħħar xhur, saret aktar diffiċli biex timmaniġġjaha.
Bħala ġenitur waħedha u sid ta’ negozju, kellha tnaqqas l-impenn tagħha fix-xogħol proprju fi żmien meta l-ispejjeż għall-kura ta’ bintha żdiedu sew.
L-omm qalet li għamlet diversi tentattivi biex issir taf x’appoġġ tista’ tingħata bintha bejn Malta u l-Irlanda. Madankollu, sakemm tinstab soluzzjoni dwar is-servizzi disponibbli, qed ikollha tħallas privatament għat-terapija u għall-kura li bintha teħtieġ barra l-ħin tal-iskola.
Hi temmen li persuna li tieħu ħsieb lit-tifla regolarment u li magħha tkun tista’ tibni relazzjoni ta’ fiduċja, tagħtiha wkoll ftit spazju biex terġa’ torganizza x-xogħol tagħha skont il-bżonnijiet ta’ bintha.
Fl-istess waqt, li tibqa’ fl-iskola attwali, mal-għalliema u sħabha li diġà taf, jagħti lill-familja aktar żmien biex tieħu deċiżjonijiet dwar il-futur tagħha.
L-appell tagħha huwa wieħed sempliċi iżda importanti: li ssib nies lesti jgħinuha f’dan il-perjodu diffiċli, sabiex bintha jkollha l-istabbiltà, il-kura u l-appoġġ li teħtieġ biex tkompli tikber u tiżviluppa f’ambjent li fih tħossha sigura.
Kif tgħid l-omm stess, “Jgħidu li biex trabbi wild, teħtieġ raħal sħiħ. Bħalissa, jien qed infittex tagħna.”
Jekk tista' tgħin lil din l-omm u bintha agħti donazzjoni permezz ta' din il-ħolqa HAWN jew anke jekk tista' xxerridha ma' ħaddieħor.
