Sid kafetterija fil-Ħamrun, Louise Pace, ikkonfermat li ta’ spiss tagħti ikel b’xejn lil persuni li jkunu verament fil-bżonn, mingħajr ebda pubbliċità, filwaqt li ċaħdet allegazzjonijiet li tħalli ikel barra l-bieb tal-ħanut.
Louise tkellmet mas-sit lokali WhosWho.mt biex tikkjarifika s-sitwazzjoni wara allegazzjonijiet li hi tħalli ikel barra l-bieb tal-kafetterija tagħha, Cafe De Republic, kull filgħaxija għal familji li jkunu għaddejjin minn sfidi.
Ritratt: Facebook/ Cafe De Republic
“Darba wieħed raġel staqsieni għal biċċa ħobż, u hemmhekk indunajt li kien tassew fil-bżonn, għax talab ħobż u mhux flus,” qalet Louise. “Għidtlu joqgħod bilqiegħda u tajtu ikla sħuna b’xejn.”
Darb’oħra kien hemm klijent li ordna trifle iżda qatt ma ġie jiġbru, u għalhekk hi tatu donazzjoni lill-istitut Fondazzjoni Sebħ, li toffri servizzi lil vittmi ta’ vjolenza domestika fil-Ħamrun. Barra ikel u xorb, qalet li darba saħansitra tat ġakketta tal-iskola lil raġel biex tgħinu tipproteġih mix-xita u l-kesħa.
Meta mistoqsija għaliex tagħmel dan kollu biex tgħin lil nies li ma tafx, Louise qalet li dan huwa sempliċiment hi min hi. “Hi parti minni,” temmet tgħid.
Prosit kbira Louise!
Facebook/ M’louise Pace
