Il-Grupp għar-Riċerka u l-Monitoraġġ Sismiku (SMRG) fi ħdan id-Dipartiment tal-Ġeoxjenzi tal-Università ta’ Malta rreġistra sinjal sismiku marbut ma’ waqgħa ta’ blat tul il-kosta ta’ Crystal Lagoon f’Kemmuna, nhar il-Ħadd 8 ta’ Novembru 2026.
Skont analiżi tar-reġistrazzjonijiet min-Netwerk Sismiku ta’ Malta, is-sinjal ġie identifikat fid-09:13:48, bil-ħin lokali, minn stazzjonijiet sismiċi f’Comino, il-Qala, ix-Xlendi u l-Imġarr.
Il-mappa li qasmet il-paġna turi d-distribuzzjoni tal-istazzjonijiet u r-reġistrazzjonijiet tagħhom, li għenu lir-riċerkaturi jidentifikaw li l-oriġini tal-avveniment kienet fil-punent ta’ Kemmuna.
Il-paġna spjegat ukoll li l-avveniment ġie rreġistrat minn tagħmir sismiku addizzjonali li dan l-aħħar ġie installat permezz tal-programm Seismology in Schools, u li qed jgħin biex jissaħħaħ il-monitoraġġ tal-attività ġeoloġika madwar il-gżejjer Maltin.
Il-Professur Sebastian D’Amico, Kap tad-Dipartiment tal-Ġeoxjenzi, esprima s-sodisfazzjon tiegħu li ħadd ma weġġa’ f’dan l-inċident, speċjalment minħabba l-popolarità ta’ Crystal Lagoon fost il-viżitaturi, l-għawwiema u dawk li jbaħħru.
Ir-ritratti ppubblikati juru wkoll il-mapep bis-sinjali rreġistrati mill-istazzjonijiet differenti, li juru kif it-teknoloġija sismika qed tgħin biex jiġu studjati aħjar avvenimenti bħal dawn.
