F’dan il-jum speċjali, il-Kalkara qed tfakkar pass importanti fl-istorja kulturali u mużikali tagħha. Kien proprju fl-4 ta’ Lulju, 39 sena ilu, meta twaqqfet uffiċjalment l-Għaqda Mużikali San Ġużepp Kalkara, soċjetà li matul is-snin saret pilastru ewlieni għall-komunità u għall-festa tar-raħal.
Is-Sindku tal-Kalkara, Wayne Aquilina, uża l-midja soċjali biex iwassal il-messaġġ sbieħ tiegħu f’dan l-anniversarju sinifikanti. Huwa rrikonoxxa l-ħidma siewja li ssir minn dawk kollha involuti u radd ħajr u awguri mill-qalb lill-Kumitat Ċentrali, lill-kumitati u fergħat kollha li jaħdmu qatigħ matul is-sena, kif ukoll lill-partitarji u l-ammiraturi numerużi ta’ din l-għaqda.
Matul dawn id-deċennji, is-soċjetà mhux biss rawmet talenti mużikali ġodda, iżda żammet ħaj it-tradizzjonijiet u l-briju li jsebbħu l-Kalkara. Awguri għal aktar snin ta’ suċċessi u mużika sabiħa f’dan ir-raħal pittoresk!
