Il-kantant Bahjat ħabbar it-tnedija tal-kanzunetta l-ġdida tiegħu Haya Ħdejja, l-ewwel produzzjoni tiegħu bil-Malti, bl-Ingliż u bl-Għarbi flimkien – proġett li qed jiddeskrivih bħala pass importanti ħafna kemm fil-karriera artistika tiegħu kif ukoll fil-vjaġġ personali tiegħu f’Malta.
Bahjat spjega kif għal snin twal kien qed ifittex mod kif jittraduċi l-istorja tiegħu fil-mużika, mhux biss bħala artist iżda bħala persuna li tgħix bejn kulturi, lingwi u identitajiet differenti.
Huwa wasal Malta fl-2011 wara li ħarab mill-gwerra f’pajjiżu, u qal li minn dejjem kellu ħolma waħda kbira: li jagħti lura xi ħaġa lill-pajjiż li tah sigurtà, kenn u bidu ġdid.
Skont Bahjat, il-mużika hija mezz biex juri eżempju pożittiv ta’ integrazzjoni permezz tal-arti, il-kultura u l-kanzunetti.
Huwa qal li jħossu tant kburi li qed joħroġ Haya Ħdejja, li kiteb u koproduċa flimkien mal-produttur Malti Howard Keith Debono.
Il-kantant sostna li għalih hemm simboliżmu qawwi fil-fatt li kelma Għarbija u oħra Maltija qed jidhru flimkien fl-istess titlu ta’ kanzunetta. Qal li dan jirrappreżenta żewġ dinjiet li qed jiltaqgħu f’armonija – l-għeruq Għarab tiegħu u d-dar Maltija li bena matul dawn is-snin.
Bahjat qal ukoll li jixtieq jagħti s-sehem tiegħu biex il-lingwa Maltija tkompli tkun iċċelebrata anke fil-mużika pop internazzjonali.
Huwa ddeskriva l-kanzunetta bħala bidu ta’ kapitlu ġdid kemm għalih kif ukoll għall-istil mużikali “A-POP” li ħoloq hu stess, stil li jirrifletti l-esperjenzi kulturali differenti li għex.
Il-kanzunetta se tkun ukoll parti minn proġett televiżiv Ewropew kbir li mistenni jilħaq aktar minn miljun telespettatur.
Bahjat ħabbar li aktar dettalji dwar il-proġett, inkluż l-istorja wara l-artista mistiedna Neïf, se jiġu żvelati aktar tard din is-sena.
Fl-aħħar, Bahjat sostna li għalih li jirrappreżenta lil Malta fuq pjattaforma internazzjonali jfisser ħafna aktar minn sempliċiment il-pajjiż fejn jgħix.
Huwa qal li jixtieq iwassal il-kultura, il-lingwa u l-ispirtu Malti lil udjenzi internazzjonali, filwaqt li jaqsam storja ta’ konnessjoni, appartenenza u kontribuzzjoni.
Nifirħulek u nawgurawlek mill-qalb, Bahjat!
