24 sena wara l-esperjenza memorabbli tagħha fil-Eurovision Song Contest, Ira Losco qasmet riflessjoni emozzjonanti dwar kif dik il-parteċipazzjoni bidlitilha ħajjitha għal dejjem. F’messaġġ fuq il-midja soċjali, Ira stqarret li meta rrappreżentat lil Malta fl-2002 bil-kanzunetta 7th Wonder, ma kellhiex idea kemm il-Eurovision kien avveniment importanti għall-Maltin.
Hija spjegat li dak iż-żmien kienet tagħmel mużika differenti ħafna u għalhekk daħlet għall-esperjenza mingħajr pressjoni kbira jew aspettattivi enormi. Ira qalet li dik kienet l-ewwel darba li kantat quddiem folla u udjenza televiżiva daqshekk kbira, filwaqt li ammettiet li lanqas biss kienet taf li biljuni ta’ nies kienu jsegwu l-kompetizzjoni madwar id-dinja.
Hija fakkret ukoll kif dak iż-żmien ma kienx jeżisti l-fenomenu tal-pre-parties tal-Eurovision, u lanqas il-midja soċjali bħall-Instagram, Facebook jew TikTok. “Kien żmien differenti u ħafna aktar sempliċi,” kitbet Ira. Il-kantanta Maltija rrakkontat kif il-promozzjoni tal-kanzunetta kienet tinkludi żjarat f’diversi pajjiżi Ewropej fosthom ir-Renju Unit, Spanja, il-Finlandja, il-Latvja, il-Litwanja u Ċipru.
Ira qalet li minkejja d-diżappunt li spiċċat fit-tieni post wara l-Latvja b’distakk ta’ 12-il punt, l-esperjenza kienet waħda eċċitanti immens. Hija qalet li qatt ma tinsa l-merħba kbira li ngħatat fl-Ajruport Internazzjonali ta’ Malta meta rritornat lura Malta, fejn eluf ta’ nies inġabru biex jilqgħuha bħala eroj.
“Dak il-mument fetaħli ħafna bibien,” qalet Ira, filwaqt li spjegat kif wara l-Eurovision bdiet iddoqq madwar l-Ewropa u taħdem ma’ artisti internazzjonali. Illum, wara aktar minn żewġ deċennji fuq il-palk, Ira qalet li għadha tħobb kull sekonda li tqatta’ tkanta quddiem il-pubbliku u tibqa’ grata għall-appoġġ li dejjem irċeviet mingħand il-Maltin.
“Mument wieħed biddel ħajti għall-aħjar,” temmet tgħid il-kantanta Maltija.
Facebook / Ira Losco
