Ilbieraħ, it-telespettaturi tas-sensiela lokali Casa Celestina kienu sorpriżi b’dehra li żgur mhux se tintesa faċilment. L-attur veteran Mario Micallef ġie introdott fis-sensiela fil-parti ta’ Effie Shead, karattru femminili li diġà qanqal ħafna kurżità u diskussjoni fost is-segwaċi tas-sensiela.
Effie Shead tidher bħala mara li tidħol fid-dar tal-anzjani Casa Celestina u, minn qabel tidħol, tingħata trattament speċjali, kważi bħal donnu firxulha t-tapit aħmar. Il-mod kif il-karattru jiġi milqugħ jindika li hemm raġuni partikolari għal dan kollu, raġuni li għadha ma ġietx żvelata iżda nistennew li l-istorja tkompli tiżviluppa.
Għalkemm id-dehra u l-kunċett tal-karattru jistgħu jidhru sorprendenti jew anke umoristiċi fuq il-wiċċ, kollox jissuġġerixxi li hemm storja serja u profonda wara l-istorja ta’ Effie Shead. Il-prestazzjoni ta’ Mario Micallef diġà qed titqies bħala waħda kuraġġuża u b’saħħitha, li tmiss temi sensittivi u umani li ħafna jistgħu jirrelataw magħhom.
B’dan ir-rwol, Mario Micallef jerġa’ jikkonferma l-versatilità tiegħu bħala attur u l-kapaċità li jinterpreta karattri li mhux biss jispikkaw, iżda wkoll iħallu impatt emozzjonali. It-telespettaturi issa qed jistennew b’ħerqa biex jiskopru x’inhi l-verità wara Effie Shead u x’se tkun il-mixja tagħha fi ħdan Casa Celestina.
Segwu l-episodju HAWN!
Facebook / Casa Ċelestina – TVM
