L-eks Membru Parlamentari Ewropew Claudette Abela Baldacchino qasmet mument emozzjonanti wara li temmet il-HYROX Doubles flimkien ma’ Jean Cassar, li ddeskriviet bħala l-ħabib ta’ ispirazzjoni li għeleb kull sfida b’determinazzjoni kbira minkejja li jinsab fuq l-ispettru tal-awtiżmu.
F’messaġġ fuq il-midja soċjali, Abela Baldacchino qalet li t-tlielaq tal-HYROX Doubles huma ta’ sfida fihom infushom, iżda li l-esperjenza tieħu tifsira ferm akbar meta taqsamha ma’ persuna li tiffaċċja kull ostaklu b’qalb kbira u b’rieda li ma taqtax qalbha.
"Huwa diffiċli tagħmel HYROX Doubles, iżda tagħmlu ma’ xi ħadd li jiġġieled kull ostaklu b’determinazzjoni u b’qalb kbira jagħmel kull pass jiswa," kitbet. Hija saħqet ukoll li l-awtiżmu m’għandux jitqies bħala limitazzjoni, iżda bħala mod differenti u straordinarju kif persuna tista’ tiddi u turi l-potenzjal tagħha.
"L-awtiżmu ma jillimitax – sempliċement juri lid-dinja mod differenti u straordinarju kif wieħed jista’ jiddi," sostniet.
Abela Baldacchino qalet li l-fatt li qasmu l-linja finali flimkien kien mument li se jibqa’ mnaqqax fil-memorja tagħha għal dejjem. Hija rringrazzjat lil Jean talli kien eċċezzjonali matul l-isfida kollha, filwaqt li esprimiet is-sodisfazzjon tagħha għall-kisba li rnexxielhom jilħqu flimkien.
Il-messaġġ tagħha ġie milqugħ b’ħafna kummenti ta’ tifħir, b’bosta jfaħħru kemm il-kisba sportiva kif ukoll il-messaġġ qawwi favur l-inklużjoni u r-rikonoxximent tal-kapaċitajiet ta’ persuni fuq l-ispettru tal-awtiżmu.
Facebook / Ella Scicluna
