L-attur Malti Henry Zammit Cordina kiseb suċċess ieħor fil-karriera tiegħu wara li rebaħ il-premju għall-Aqwa Attur fil-Christian Film Festival, li sar fi Florida, l-Istati Uniti, għall-interpretazzjoni tiegħu fil-film Illusion of Faith. F’messaġġ fuq il-midja soċjali, Zammit Cordina esprima l-ferħ tiegħu għal din il-kisba, filwaqt li qal li, għalkemm dejjem ikun ta’ sodisfazzjon li wieħed jiġi nnominat, din id-darba mar pass ’il quddiem billi rebaħ il-premju.
"Dejjem ikun sabiħ li tkun nominat... iżda din id-darba... ma kinitx biss nominazzjoni... iżda Premju għall-Aqwa Attur. Grazzi lil Aleksa Ristovic talli tani din l-opportunità," kiteb. Huwa żied li Illusion of Faith ma waqafx biss fuq ir-rebħa tiegħu, hekk kif il-produzzjoni rebħet ukoll tliet premjijiet oħra waqt l-istess festival. "Illusion of Faith rebaħ ukoll tliet premjijiet oħra. Prosit lil kulħadd," temm jgħid.
Ir-rebħa fil-festival, li sar fi Florida, tkompli ssaħħaħ il-karriera internazzjonali ta’ Zammit Cordina u tirrikonoxxi t-talent tiegħu fuq il-palk u quddiem il-kameras. Fl-istess ħin, is-suċċess ta’ Illusion of Faith jixhed il-kwalità tal-produzzjoni u l-ħidma tat-tim kollu wara dan il-proġett.
Facebook / Henry Zammit Cordina
