Tim kirurġiku fl-Isptar Saint James wettaq għall-ewwel darba fis-settur privat tas-saħħa f’Malta hysterectomy permezz tat-teknika vNOTES, proċedura minimament invażiva li tista’ twassal għal inqas uġigħ, ebda marki esterni u rkupru aktar mgħaġġel għal pazjenti eliġibbli.
It-tim magħmul minn sitt professjonisti u mmexxi mill-konsulent fl-ostetrija u l-ġinekoloġija, Dr Johann Craus, wettaq b’suċċess l-ewwel proċedura ta’ Vaginal Natural Orifice Transluminal Endoscopic Surgery, magħrufa bħala vNOTES, fl-isptar. Permezz ta’ din it-teknika avvanzata, il-kirurgi jistgħu jdaħħlu strumenti speċjalizzati u kamera mill-vaġina sabiex ineħħu l-utru mingħajr il-ħtieġa ta’ inċiżjonijiet fiż-żaqq.
"Din il-proċedura tinsab fuq quddiem nett fil-kirurġija ġinekoloġika. Pazjenti eliġibbli jistgħu jistennew inqas uġigħ wara l-operazzjoni, żjara iqsar fl-isptar u rkupru ferm aktar mgħaġġel, li jippermettilhom jirritornaw għall-attivitajiet normali tagħhom aktar kmieni," spjega Dr Craus.
Hu qal li t-twettiq tal-ewwel proċedura ta’ dan it-tip fi sptar privat kien żvilupp importanti għat-tim kollu u esprima s-sodisfazzjon tiegħu għall-mod kif sar l-intervent. "Il-kirurġija tlestiet b’mod aktar effiċjenti milli konna qed nistennew, grazzi għall-esperjenza tat-tim kirurġiku u t-teknoloġija avvanzata disponibbli f’Saint James Hospital, fosthom is-sistema moderna ta’ immaġini laparoskopiċi 4K," qal Dr Craus.
Skont Dr Craus, il-proċeduri vNOTES ġeneralment jieħdu inqas ħin minn hysterectomies laparoskopiċi konvenzjonali. Il-fatt li ma jsirux inċiżjonijiet fiż-żaqq iwassal ukoll għal riżultat estetiku aħjar u jista’ jgħin lill-pazjenti jirkupraw u jirritornaw għall-ħajja ta’ kuljum tagħhom aktar malajr. It-teknika tista’ tintuża wkoll f’każijiet magħżula għat-tneħħija ta’ ċesti fl-ovarji jew tat-tubi fallopjani. Madankollu, il-vNOTES mhix adattata għal kull pazjenta u għalhekk trid issir evalwazzjoni klinika bir-reqqa minn qabel.
Dr Craus spjega li pazjenti b’endometrijożi avvanzata jew kundizzjonijiet ġinekoloġiċi kumplessi oħra jistgħu ma jkunux eliġibbli għal din it-teknika u jkollhom bżonn approċċ kirurġiku differenti. Hu saħaq li l-prijorità tibqa’ li jintgħażel l-aktar trattament sigur u effettiv għal kull pazjenta.
Il-Kap Eżekuttiv ta’ Saint James Hospitals, Jean Claude Muscat, spjega li l-hysterectomies huma fost l-interventi li jsiru b’mod regolari fl-isptarijiet tal-grupp. Għaldaqstant, l-introduzzjoni tal-vNOTES tirrappreżenta pass ieħor fl-użu ta’ proċeduri minimament invażivi, f’konformità mal-aħjar prattiki internazzjonali.
"Il-benefiċċji għall-pazjenti eliġibbli huma sinifikanti. Ninsabu ħerqana li nagħmlu dan l-approċċ disponibbli għal aktar nisa li jistgħu jibbenefikaw minnu, filwaqt li nkomplu nsaħħu l-firxa ta’ kura kirurġika avvanzata li noffru f’Saint James," temm jgħid Muscat.
Facebook / Saint James Hospital
