Gaia Cauchi, Destiny u Keane Cutajar tħabbru bħala t-tliet preżentaturi tal-24 edizzjoni tal-Junior Eurovision Song Contest, li din is-sena se jsir proprju f’Malta. PBS, ix-xandar ospitanti tal-edizzjoni tal-2026, ħabbar li t-tliet personalitajiet se jkunu qed imexxu s-serata l-kbira tas-Sibt 24 ta’ Ottubru, mill-Malta Fairs and Conventions Centre (MFCC) f’Ta’ Qali.
L-għażla ta’ Gaia u Destiny għandha tifsira speċjali għall-istorja ta’ Malta fil-Junior Eurovision. Gaia Cauchi kienet tat lil Malta l-ewwel rebħa tagħha fil-konkors fl-2013, filwaqt li sentejn wara Destiny kompliet fuq dan is-suċċess bit-tieni rebħa għal pajjiżna. Destiny aktar tard irrappreżentat ukoll lil Malta fil-Eurovision Song Contest tal-2021.
Issa, snin wara s-suċċessi tagħhom bħala kantanti żgħażagħ, Gaia u Destiny se jirritornaw fuq il-palk tal-Junior Eurovision, din id-darba bħala preżentaturi. Magħhom se jingħaqad Keane Cutajar, wiċċ magħruf sew mat-telespettaturi Maltin. It-tliet preżentaturi diġà kellhom l-opportunità jaħdmu flimkien aktar kmieni din is-sena, meta ppreżentaw il-Malta Eurovision Song Contest 2026.
Fis-serata tal-24 ta’ Ottubru, Gaia, Destiny u Keane se jmexxu spettaklu li fih 16-il artist żagħżugħ minn madwar l-Ewropa se jitilgħu fuq il-palk tal-MFCC biex jirrappreżentaw lil pajjiżhom. It-tema magħżula għal din l-edizzjoni hija The Festa, ispirata mit-tradizzjoni tant għal qalb il-Maltin tal-festi tal-irħula. Permezz tagħha, l-organizzaturi qed iwiegħdu li jwasslu l-kulur, l-enerġija u l-atmosfera tal-festa Maltija lil miljuni ta’ telespettaturi madwar l-Ewropa.
Il-Junior Eurovision Song Contest 2026 se jsir is-Sibt 24 ta’ Ottubru fl-MFCC f’Ta’ Qali, f’dik li mistennija tkun serata speċjali oħra għal Malta fl-istorja tal-konkors.
JuniorEurovision.tv
