Il-kantawtrici Maltija Lyndsay Pace tkompli tikseb suċċess fix-xena internazzjonali hekk kif il-kanzunetta tagħha “Fireproof” rebħet il-premju ta’ L-Aqwa Kanzunetta Originali fil-festival ta’ Sofia Grand Prix Festival li sar f’Sofia, il-Bulgarija.
Lyndsay irrappreżentat lil Malta f’dan il-festival internazzjonali fejn tellgħet fuq il-palk il-kanzunetta “Fireproof” b'prestazzjoni li kompliet turi t-talent u l-passjoni tagħha għall-mużika.
Il-kanzunetta, li kienet ukoll l-entrata tagħha fil-Malta Eurovision Song Contest fl-2024, issa kisbet rikonoxximent internazzjonali ieħor importanti.
Dan il-premju jiġi wara sena mimlija esperjenzi u kisbiet għal Lyndsay u jkompli jibni fuq il-vjaġġ tagħha lil hinn minn xtutna.
Għal artista Maltija, li tirċievi rikonoxximent bħal dan f’festival internazzjonali fil-Bulgarija huwa mument ta’ sodisfazzjon kbir u opportunità biex il-mużika Maltija tkompli tilħaq udjenzi ġodda.
“Fireproof” hija kanzunetta li titkellem dwar is-saħħa, ir-reżiljenza u l-kuraġġ li tibqa’ temmen fik innifsek, messaġġ li Lyndsay ġarret magħha fuq il-palk ta’ Sofia.
Din ir-rebha timmarka kapitlu ieħor importanti fil-karriera ta’ Lyndsay hekk kif tkompli taħdem fuq proġetti ġodda u tirrappreżenta lil Malta permezz tal-mużika tagħha fuq livell internazzjonali.
