Il-produttur tal-films imwieled fis-Serbja u bbażat f’Malta, Aleksa Ristović, kiseb suċċess internazzjonali bil-film debutt tiegħu Illusion of Faith, li nġibed kollu kemm hu f’Malta.
Il-produzzjoni saret b’kast u tim Malti u internazzjonali, filwaqt li l-pajsaġġi, il-postijiet storiċi u l-wirt reliġjuż ta’ Malta ntużaw bħala parti importanti mid-dinja viżiva tal-film. Il-film, li jgħaqqad il-misteru mal-fidi, jesplora temi bħall-mirakli, twemmin, u għalhekk Malta sservi bħala sfond ewlieni għall-istorja.
Il-konnessjoni ta’ Ristović ma’ Malta tidher ukoll fil-fatt li hu ħa sehem dirett f’diversi oqsma tal-produzzjoni, bħala kittieb, direttur, direttur tal-fotografija u produttur, filwaqt li ħadem flimkien mal-produttur Chris Johnson.
Wara li Illusion of Faith kiseb rikonoxximent f’Texas, il-film issa se jkun distribwit minn Faith Channel Distribution u se jkollu l-opportunità jilħaq udjenza internazzjonali.
Għall-udjenza Maltija, hemm ukoll pjan għal screening speċjali matul il-ġimgħa tal-Milied fuq it-televiżjoni nazzjonali, li jagħti lill-pubbliku lokali l-opportunità jara produzzjoni li nħolqot kompletament f’Malta.
Ristović saħansitra rebaħ il-premju għall-aqwa direttur f’Capernaum Studios, Content 2026, f’Texas.
