“L-Idolu Malti Tiegħi!” – Glen Vella B’Awgurju Speċjali Lil Renato F’Għeluq Sninu

Il-kantant Malti Glen Vella għażel li jawgura l-isbaħ xewqat lill-kantant Renato fl-okkażjoni ta’ għeluq sninu, permezz ta’ messaġġ mill-qalb li fih esprima l-ammirazzjoni kbira li għandu lejh. Glen iddeskriva lil Renato bħala l-idolu Malti tiegħu, filwaqt li faħħru mhux biss għat-talent tiegħu, iżda wkoll għall-karattru mill-isbaħ li għandu.

“Awguri f’għeluq sninu lill-idolu Malti tiegħi, il-kantant u entertainer kbir Renato!” kiteb Glen, filwaqt li kompla jiddeskrivih bħala persuna b’qalb kbira, dejjem lesta li tagħti s-sapport tagħha lill-oħrajn, umli immens u ta’ ispirazzjoni għal ħafna. Huwa rringrazzjah talli tul is-snin kien ta’ ispirazzjoni għalih u awguralu ħafna saħħa, ferħ u dak kollu li hu sabiħ fil-ħajja, filwaqt li saħaq li Renato jistħoqqlu biss l-aqwa affarijiet.

Mal-messaġġ tiegħu, Glen qasam ukoll ritratt speċjali li warajh hemm storja interessanti. Huwa spjega li r-ritratt ittieħed fid-dar ta’ Renato, li kien offrielu b’ġenerożità biex hemmhekk jinġibed il-vidjow mużikali tal-kanzunetta tiegħu Tagħna 2. Iżda hemm dettall ieħor li jagħmel dan ir-ritratt aktar speċjali! Glen żvela li fir-ritratt kien liebes il-kostum oriġinali li Renato kien libes fil-Eurovision Song Contest, esperjenza li ddeskriva bħala privileġġ kbir.

Ġest sabiħ li juri r-rispett u l-ħbiberija bejn żewġ artisti Maltin minn ġenerazzjonijiet differenti, magħqudin mill-imħabba tagħhom lejn il-mużika. Aħna minn Gwida.mt ningħaqdu ma’ Glen biex nawguraw lil Renato l-isbaħ xewqat f’għeluq sninu. Awguri mill-qalb!

Ritratt:

Facebook / Renato Micallef

Ixxerja

STEJJER OĦRA

AQRA IKTAR

PARTNERS UFFIĊJALI