Wara żjara promozzjonali b’suċċess fil-Litwanja matul tmiem il-ġimgħa, ir-rappreżentant Malti għall-Eurovision 2026, AIDAN, ikkonferma l-waqfiet li jmiss tat-tour Ewropew tiegħu.
Iż-żjara f’Vilnius rat lil AIDAN jinterpreta l-kanzunetta tiegħu “Bella” bħala mistieden esklussiv waqt il-Grand Final ta’ Eurovizija.LT.
Waqt li kien fil-belt kapitali, huwa deher fuq il-programm ta’ filgħodu tax-xandir nazzjonali u ta sensiela ta’ intervisti lil diversi mezzi tal-midja lokali u internazzjonali.
Matul l-avveniment, AIDAN iltaqa’ mal-finalisti u r-rebbieħ Lion Ceccah, kif ukoll ma’ waħda mill-akbar stilel tal-pop fil-Litwanja, Evgenya Redko.
Huwa qatta’ wkoll ħin mal-ammiraturi tal-Eurovision mir-reġjun Baltiku li vvjaġġaw apposta biex isegwu l-ispettaklu.
AIDAN qal: “Wara l-Bulgarija u l-Litwanja, ninsab eċċitat li nwassal ‘Bella’ fl-Iżvezja u l-Greċja wkoll. Id-delegazzjoni Maltija u jien ġejna mistiedna għal finali nazzjonali oħra li se ssir qabel il-prestazzjonijiet tiegħi fi Stokkolma u Tessaloniki. Dalwaqt inħabbru liema huwa l-pajjiż.”
It-tour issa jkompli fl-Iżvezja, fejn fis-7 ta’ Marzu AIDAN se jattendi l-avveniment Melodifestivalen Final Pre-Party.
Dan se jsir fil-post ikoniku Nalen fil-kapitali Stokkolma, u għalih se jattendu r-rappreżentanti tal-Albanija, il-Latvja u l-Montenegro, flimkien ma’ artisti Żvediżi popolari li pparteċipaw f’Melodifestivalen, li spiss huwa meqjus bħala wieħed mill-aqwa festivals nazzjonali fl-Ewropa.
Wara Stokkolma, AIDAN se jmur il-Greċja għall-appuntament annwali “Eurovision Party SKG” nhar il-Ħamis, 12 ta’ Marzu.
L-avveniment, li se jsir fil-post WE f’Tessaloniki, iservi bħala ċelebrazzjoni ewlenija tal-Eurovision fit-Tramuntana tal-Greċja, b’wirjiet diretti minn artisti Griegi u kontestanti oħra tal-Eurovision.
Din il-waqfa se tippermetti lil AIDAN jippromwovi “Bella” direttament mal-udjenza Griega f’atmosfera ddedikata għall-ammiraturi.
Dawn l-appuntamenti huma parti minn skeda promozzjonali estensiva, b’aktar pajjiżi u dati li se jitħabbru fil-jiem li ġejjin
AIDAN
