Sar appell urġenti lid-donaturi tad-demm tat-tip A Positive, hekk kif hemm bżonn immedjat ta’ ammont sostanzjali ta’ dan it-tip ta’ demm għall-pazjenti li qed jirċievu kura.
Skont l-awtoritajiet tas-servizz tad-demm, dan id-demm huwa meħtieġ b’urġenza għal pazjenti tal-onkologija, pazjenti li jbatu mit-talassemija u wkoll għal operazzjonijiet mediċi. Għalhekk, kull donazzjoni tista’ tagħmel differenza kbira u tgħin biex issalva ħajjiet.
Min jixtieq jagħti d-demm illum jista’ jagħmel dan hekk kif iċ-ċentru se jibqa’ miftuħ sat-20:00. Id-donaturi huma mitluba jieħdu magħhom il-Karta tal-Identità meta jmorru jagħtu d-demm.
Aktar informazzjoni dwar l-għoti tad-demm tista’ tinkiseb mill-websajt uffiċjali National Blood Transfusion Service Malta permezz tal-paġna blood.gov.mt, jew mill-paġni uffiċjali tagħhom fuq Facebook u Instagram.
Dawk interessati jistgħu wkoll iċemplu fuq 7930 7307 jew 2206 6201 biex jistaqsu dwar kwalunkwe diffikultà jew mistoqsija li jista’ jkollhom dwar id-donazzjoni. Barra minn hekk, trasport b’xejn huwa wkoll provdut għal min ikollu bżonn, billi jċempel fuq 2206 6201.
L-awtoritajiet qed jappellaw lill-pubbliku biex, jekk jistgħu, jagħtu d-demm illum, hekk kif donazzjoni waħda tista’ tagħmel differenza kbira fil-ħajja ta’ diversi pazjenti.
