L-Iskola San Anton b’niket ħabbret il-mewt ta’ Dr. Lara Lawrence née Schembri, eks studenta tal-iskola mill-klassi tal-2002.
F’messaġġ li qasmet fuq il-midja soċjali, l-iskola sellmet il-memorja tagħha u fakkret fil-karriera notevoli li bniet fir-Renju Unit bħala inġiniera fl-aerodinamika u Project Manager mal-kumpanija Jaguar Land Rover.
Is-suċċessi tagħha kienu ta’ ispirazzjoni għall-istudenti u kienet saħansitra dehret fil-fuljett u fuq il-website tal-iskola bħala eks studenta li rnexxielha tagħmel isem lilha nnifisha.
"Lara kompliet tibni karriera notevoli fir-Renju Unit. Hija lestiet it-teżi tad-dottorat (PhD) tagħha dwar id-Dinamika tal-Fluwidi Komputazzjonali (CFD) ma’ Red Bull f’Milton Keynes," jiktbu San Anton School.
L-eks sħabha tal-iskola jiftakru lil Lara bħala waħda mill-aktar studenti brillanti ta’ żmienha, persuna versatili li dejjem kellha tbissima fuq wiċċha u kienet tipparteċipa f’dak kollu li kienet toffri l-ħajja skolastika.
L-Iskola San Anton wasslet il-kondoljanzi tagħha lill-familja, lill-ħbieb u lil dawk kollha li kienu jafuha u ħabbewha, b’mod partikolari lil sħabha tal-klassi tal-2002.
L-iskola temmet il-messaġġ tagħha billi qalet li Lara se tibqa’ dejjem parti mill-familja tal-Iskola San Anton u li l-memorja tagħha se tibqa’ tgħix magħhom.
Insellmu l-memorja ta' Dr. Lara Lawrence u nagħtu l-kondoljanzi tagħna.
