Suċċess kbir għal Come Dine With Me Malta hekk kif il-produzzjoni ħabbret li l-programm sar l-aktar wieħed segwit fost il-programmi kollha fuq l-istazzjonijiet televiżivi Maltin.
Permezz ta’ grafika li qasmet fuq il-midja soċjali, il-produzzjoni ċċelebrat din il-kisba b’messaġġ sempliċi iżda sinifikanti, “L-iktar programm segwit fost il-programmi kollha fuq l-istazzjonijiet kollha. Grazzi.”
Din il-kisba tikkonferma l-popolarità dejjem tikber tal-format lokali, li rnexxielu jirbaħ il-qalb ta’ eluf ta’ telespettaturi Maltin u Għawdxin. Il-programm, li jlaqqa’ flimkien tisjir, divertiment u personalitajiet differenti, sar wieħed mill-aktar programmi diskussi kemm fuq it-televiżjoni kif ukoll fuq il-midja soċjali.
L-aħbar tasal ftit wara li t-tim tal-produzzjoni ħabbar ukoll li diġà beda jaħdem fuq staġun ġdid, sinjal ċar tal-fiduċja li hemm fis-suċċess kontinwu tal-programm. Matul l-aħħar staġuni, Come Dine With Me Malta ppreżenta għadd ta’ kontestanti minn kull rokna tal-pajjiż, b’mumenti divertenti, emozzjonanti u kultant kontroversjali li żammew lill-udjenzi mwaħħlin mal-iskrins tagħhom.
Il-produzzjoni rringrazzjat lit-telespettaturi kollha tal-appoġġ tagħhom, filwaqt li wegħdet aktar divertiment fil-futur. B’dawn ir-riżultati impressjonanti, jidher li Come Dine With Me Malta qed ikompli jikkonsolida postu bħala wieħed mill-aktar programmi ta’ suċċess fix-xena televiżiva lokali.
Facebook / Come Dine With Me Malta
