Il-Villaġġ tal-Artiġjanat f’Ta’ Qali se jerġa’ jimtela bil-ħajja u l-kuluri hekk kif Festa Lwien tirritorna nhar il-Ġimgħa, 7 ta’ Awwissu, b’serata mimlija mużika, artiġjanat, ikel u divertiment għall-familja kollha. Fost il-punti ewlenin tal-programm se jkun hemm kunċert b’xejn mill-grupp popolari Airport Impressions.
Organizzat mill-Malta Crafts Foundation, l-avveniment huwa ispirat mill-atmosfera ta’ festa tradizzjonali Maltija u għandu l-għan li jgħaqqad flimkien il-kultura, il-wirt u t-talent lokali f’ambjent uniku.
Matul is-serata, il-viżitaturi se jkollhom l-opportunità jżuru l-workshops tal-artiġjani residenti, jiltaqgħu magħhom u jiskopru xogħlijiet uniċi maħduma bl-idejn. Barra minn hekk, diversi artiġjani oħra se jkunu qed jesebixxu x-xogħol tagħhom fit-toroq tal-villaġġ, filwaqt li għadd ta’ stands tal-ikel u x-xorb se jkomplu joħolqu atmosfera festiva.
Il-programm mużikali mhux se jieqaf mal-kunċert ta’ Airport Impressions. It-Tikka Banda se ddur mat-toroq tal-villaġġ bil-marċi popolari tagħha, filwaqt li L-iŻgej u Sħabu se jwasslu l-għana tradizzjonali Malti, wieħed mill-aktar elementi awtentiċi tal-wirt kulturali tal-pajjiż.
Anke t-tfal se jkollhom x’jagħmlu, b’diversi logħob u attivitajiet organizzati apposta għalihom matul il-lejla. Festa Lwien se ssir nhar il-Ġimgħa, 7 ta’ Awwissu, mill-18:30 ’l quddiem, fil-Villaġġ tal-Artiġjanat f’Ta’ Qali, b’dħul kompletament bla ħlas.
Dawk interessati jistgħu jsibu aktar informazzjoni fuq is-sit tal-Malta Crafts Foundation jew permezz tal-paġni uffiċjali tagħha fuq il-midja soċjali.
Facebook / Malta Crafts Foundation
