Mietet Luna, il-kelba li għal snin sħaħ kienet tagħmel parti mill-Uffiċċju tal-Kummissarju tal-Annimali u li kienet magħrufa għall-karattru ġentili tagħha ma’ dawk li kienu jżuru l-uffiċċju.
L-aħbar tħabbret mis-Segretarju Parlamentari Alicia Bugeja Said permezz ta’ messaġġ emozzjonanti fuq il-midja soċjali, fejn kitbet: “Dal-lejl ħallietna Luna, il-kelba fl-uffiċċju tal-Kummissarju tal-Annimali. Kemm kont tferraħ tfal Luna. Il-memorja tiegħek tibqa’ tgħix f’qalbna.”
Luna kienet magħrufa għall-karattru ħelu tagħha u għall-ferħ li kienet iġġib lil dawk kollha li kienu jiltaqgħu magħha, speċjalment it-tfal li kienu jżuru l-uffiċċju. Matul is-snin, hija saret wiċċ familjari għal ħafna u rebħet il-qlub ta’ bosta persuni.
Wara t-tħabbira, diversi persuni esprimew is-sogħba tagħhom u sellmu l-memorja ta’ Luna, filwaqt li rringrazzjawha għall-mumenti sbieħ li ħalliet warajha. Il-memorja tagħha se tibqa’ tgħix fil-qlub ta’ dawk kollha li kellhom ix-xorti jiltaqgħu magħha.
Facebook / Alicia Bugeja Said
