Il-gvern qed jippjana li jestendi l-Covid wage supplement sa wara Marzu b’taħditiet li bħalissa qed iseħħu mal-imsieħba soċjali, qal illum il-Prim Ministru Robert Abela.
Is-suppliment kien inizjalment introdott is-sena li għaddiet meta faqqgħet il-pandemija biex tgħin lin-negozji milquta ħażin. L-iskema ġiet irranġata x-xahar li għadda bbażata fuq it-telf imġarrab min-negozji.
“Ma jagħmilx sens għalina f’dan il-mument, meta qed naraw id-dawl fit-tarf tal-mina, li nneħħu l-appoġġ li huwa kruċjali għan-negozji tagħna,” qal Robert Abela llum.
Bi tweġiba għall-mistoqsijiet tal-midja, il-Prim Ministru qal li għandu “kunfidenza kbira” li l-pajjiż ser jerġa’ lura għan-normal minn Mejju. “Aħna issa qed imexxu fl-Ewropa fin-numru ta’ tilqim per capita,” huwa qal, waqt li nnota li l-programm ta’ tilqim tal-gżejjer u l-miżuri ekonomiċi fis-seħħ jagħmluh kunfidenti li l-pajjiż se jkun “fejn irridu nkunu” sa Mejju.
Facebook/Robert Abela
