Id-duo rinomat Malti tal-moda Charles & Ron qasmu riflessjoni emozzjonanti hekk kif l-istorja personali u professjonali tagħhom se tkun irrakkontata fuq l-iskrin. F’messaġġ fuq il-midja soċjali, Charles & Ron ammettew li l-vjaġġ tagħhom kien wieħed mimli tlugħ u nżul, sfidi, tbatija u mumenti sbieħ li sawruhom tul is-snin. "It-tlugħ u l-inżul, l-uġigħ, l-isfidi u l-isbaħ mumenti... Ma kinitx dejjem faċli," kitbu.
Huma rrakkontaw li meta Pierre ressaqilhom l-idea li jirrakkonta l-istorja tagħhom, ħassewhom eċċitati iżda fl-istess ħin kemxejn imbeżżgħin. Qalu li hija esperjenza surreali tara l-istorja ta’ ħajtek tieħu l-ħajja fuq l-iskrin.
Madankollu, hekk kif raw xi xeni mill-produzzjoni u emozzjonaw ruħhom, indunaw li l-proġett kien f’idejn tajbin. "Wara li rajna xi xeni u emozzjonajna ruħna ħafna, konna nafu li konna f’idejn tajbin. Grazzi talli rrakkontajt l-istorja tagħna," temmew jgħidu, filwaqt li rringrazzjaw lil Pierre talli wassal il-vjaġġ tagħhom b’dan il-mod.
Il-messaġġ ta’ Charles & Ron diġà qajjem interess fost is-segwaċi tagħhom, li qed jistennew b’ħerqa jaraw kif l-istorja ta’ wieħed mill-aktar ismijiet magħrufa fid-dinja tal-moda Maltija se tkun irrakkontata fuq l-iskrin.
Facebook / C&R
