Titjib fil-fergħat, servizzi aġġornati u investiment fid-diġitalizzazzjoni qed jagħtu lill-klijenti aktar għażla u flessibbiltà fil-mod kif jagħmlu l-operazzjonijiet bankarji tagħhom. Il-Bank of Valletta qed ikompli jinvesti fin-network tal-fergħat tiegħu sabiex il-klijenti jkollhom aċċess aktar faċli għas-servizzi bankarji, kemm jekk jagħżlu li jżuru fergħa, jużaw il-faċilitajiet ta’ self-service jew il-pjattaformi diġitali.
Wieħed mill-aktar investimenti riċenti huwa t-tkabbir tal-Fergħa tal-BOV fir-Rabat. L-estensjoni, li issa tinsab kompletament operattiva, toffri spazju aktar komdu kemm għall-klijenti kif ukoll għall-impjegati, filwaqt li tippermetti lill-Bank ikompli jagħti servizz personali lill-komunità.
Il-Fergħa tal-Ħamrun ukoll reġgħet fetħet wara xogħlijiet ta’ manutenzjoni u qed tilqa’ lill-klijenti mit-Tnejn sal-Ġimgħa bejn it-8:30 u s-13:30. Is-servizz tal-kaxxiera huwa disponibbli sat-11:00, filwaqt li s-servizzi l-oħra jibqgħu jingħataw b’appuntament.
F’Għawdex, is-servizz tal-kaxxiera fl-aġenziji tan-Nadur, tax-Xagħra u tax-Xewkija issa qed jingħata fi ġranet speċifiċi, sabiex is-servizzi jirriflettu aħjar il-mod kif il-klijenti jużawhom illum, filwaqt li jibqa’ garantit l-aċċess għas-servizzi essenzjali. Geoffrey Ghigo, Head Personal Banking Channels fil-Bank of Valletta, qal li l-ħtiġijiet tal-klijenti qed jinbidlu u l-Bank qed iwieġeb billi joffri aktar għażla.
"Hekk kif nibqgħu nżommu network b’saħħtu ta’ fergħat u aġenziji madwar Malta u Għawdex, qed inkomplu ninvestu wkoll f’soluzzjonijiet diġitali u ta’ self-service li ħafna mill-klijenti jużaw kuljum," qal Ghigo. Huwa żied li l-għan tal-Bank huwa li jagħmel is-servizzi finanzjarji aktar faċli u konvenjenti, filwaqt li jħalli lill-klijenti jagħżlu jekk jużawx fergħa, ATM, pagamenti contactless jew internet u mobile banking.
Il-BOV ikompli wkoll joffri servizz bi prijorità lill-klijenti ta’ 60 sena jew aktar kull nhar ta’ Ġimgħa bejn it-8:15am u d-9:30am fil-fergħat kollha tiegħu. Permezz tal-investiment kontinwu fil-fergħat u fit-teknoloġija diġitali, il-Bank qed ikompli joffri aktar flessibbiltà, aktar konvenjenza u aktar għażla, filwaqt li jżomm is-servizz personali fil-qalba tar-relazzjoni tiegħu mal-klijenti.
