Aħbar li timla l-qlub bit-tama u l-ferħ ġiet imħabbra mill-Arċidjoċesi ta’ Malta fuq il-mezzi soċjali tagħha, hekk kif tħabbar li l-Knisja f’Malta se tkun qed tilqa’ saċerdot ġdid aktar tard din is-sena. Din l-ordinazzjoni tirrappreżenta mument sinifikanti mhux biss għall-komunità Griega-Kattolika, iżda wkoll għall-Knisja Maltija kollha.
L-Arċidjoċesi ta’ Malta fuq il-mezzi soċjali tagħhom kitbu aħbar pożittiva mmens. Huma ħabbru, “Il-Knisja f’Malta se jkollha saċerdot ġdid nhar il-Ħadd, 8 ta’ Frar 2026. L-Eżarka tal-Griegi Kattoliċi tal-Greċja, Mons. Manuel Nin O.S.B., fil-preżenza tal-Arċisqof Charles Scicluna, se jordna saċerdot lir-Rev. Jesmond Schembri, djaknu tal-Parroċċa Griega-Kattolika Sidtna Marija ta’ Damasku, il-Belt Valletta.”
Huma jkomplu jispjegaw, “Il-quddiesa tal-ordinazzjoni se ssir fil-Knisja ta’ San Nikola ta’ Mira (Tal-Erwieħ) fil-Belt Valletta fid-9:30. It-tama ta’ Rev. Jesmond Schembri bħala saċerdot hi li jkun jista’ jwassal il-ħniena t’Alla, speċjalment permezz tas-sagrament tar-rikonċiljazzjoni.”
L-ordinazzjoni saċerdotali ta’ Rev. Jesmond Schembri hija xhieda ta’ vokazzjoni li twieldet mis-servizz u d-dedikazzjoni lejn il-komunità. It-tama tiegħu li jwassal il-ħniena t’Alla, b’mod partikulari permezz tas-sagrament tar-rikonċiljazzjoni, tagħti x’jifhem li l-ministeru tiegħu se jkun imsejjes fuq il-qrubija, il-kompassjoni u l-fejqan spiritwali.
Dan il-jum se jibqa’ mument memorabbli għall-Knisja f’Malta u għal dawk kollha li se jkunu qed jakkumpanjawh f’dan il-vjaġġ ġdid ta’ servizz.
Facebook / Archdiocese of Malta
