Wara li s-sena l-oħra Johann Caruana daħal b’suċċess fix-xena mużikali kemm dik lokali, kif ukoll dik internazzjonali, issa ħareġ l-ewwel album tiegħu, ‘Astra Nomina’, album b’ mużika fi stil Trance u Techno.
‘Astra Nomina’, huwa album strumentali bi 12-il diska, spirat mill-ispirtu melodiku u emozzjonali tat-Trance klassiku Ewropew, li jiġbed l-influwenza minn artisti bħal Mauro Picotto, Paul van Dyk, Tiësto, ATB, u Alice Deejay.
‘Astra Nomina’ hija frażi li tgħaqqad termini Latini relatati ma’ stilel u ismijiet.
Astra: Latin għal “stilel,” tirreferi għal stilla, stilel, jew kostellazzjoni, u din hija assoċjata mal-luminożità, l-aspirazzjoni, u s-smewwiet, filwaqt li Nomina: Latin għal “ismijiet”. Għalhekk, Astra Nomina tirreferi għal “Ismijiet tal-Istilel”.
L-isem tal-album huwa purament metafora u l-għan ewlieni tiegħu hu li jesplora r-ripetizzjoni bħala ritwal, il-melodija bħala memorja, u t-Trance bħala lingwaġġ etern.
Dan l-album huwa mfassal bħala vjaġġ kontinwu bejn l-antik u l-kożmiku, bil-għan li jeħdok fuq vjaġġ eklettiku li huwa ukoll evidenti fil-videos mużikali ta’ dawn id-diski.
B’tul ta’ madwar 47 minuta, f’dan l-album, Johann iħallat ritmi elettroniċi qawwija ma’ elementi modali u atmosferiċi, derivati minn tradizzjonijiet Biżantini, Ċeltiċi, u Gregorjani.
Johann Caruana
