Is-Soċjetà Mużikali Beland A.D. 1861 taż-Żejtun kompliet issaħħaħ il-wirt mużikali tagħha bit-tnedija ta’ żewġ albums ġodda, “Mater Dolorosa”, album ta’ marċi funebri, u “Resurrexit Sicut Dixit”, album li jinkludi għażla sabiħa ta’ valzi.
Dawn il-produzzjonijiet ġew irrekordjati mill-Banda Beland taħt id-direzzjoni tas-Surmast Direttur Mro. Gordon Baldacchino, li mexxa lill-bandisti b’dedikazzjoni u professjonalità, filwaqt li l-produzzjoni saret minn Alan Schembri Recording Studios, li żgurat kwalità għolja ta’ reġistrazzjoni u ħoss eċċellenti.
L-albums jiffurmaw it-12 u t-13-il volum ta’ sensiela speċjali li bdiet fl-2003 u li matul is-snin saret punt ta’ referenza għall-partitarji tal-mużika tal-banda. Din is-sensiela tinkludi kompożizzjonijiet minn diversi kompożituri rinomati, b’rabta diretta mal-Banda Beland, u tkompli tippreserva u xxandar repertorju marbut mal-festi reliġjużi.
Kull volum f’din il-kollezzjoni jirrappreżenta vara minn fost is-sett artistiku tal-vari tal-Ġimgħa l-Kbira u l-Irxoxt li jinsabu fil-parroċċa taż-Żejtun, u b’hekk dawn l-albums għandhom ukoll valur kulturali u devozzjonali.
Min jixtieq jakkwista dawn l-albums jista’ jagħmel dan minn dawn il-postijiet:
- Fiż-Żejtun: Bar tal-Każin Beland, Juve Bar jew Sunny Ironmongery
- Ħal Qormi: Caccu Bar
Din hija opportunità sabiħa biex wieħed jappoġġja l-ħidma tal-Banda Beland u jgawdi mużika ta’ kwalità li tkompli tarrikkixxi l-patrimonju mużikali tagħna.
