Fl-aħħar ftit sigħat kienu qed jiġu diskussi d-dekasteri tat-tmexxija tal-pajjiż, u post wieħed li ġibed l-attenzjoni ta’ ħafna Maltin żgur li kienet il-Berġa ta’ Kastilja. Il-ġurnalist Melvic Zammit f’kitba li qasam fuq il-midja soċjali lbieraħ, irrakkonta l-istorja affaxxinanti ta’ din il-binja ikonika li llum hija sinonima mal-Uffiċċju tal-Prim Ministru u mal-qalba tad-deċiżjonijiet politiċi f’Malta.
Wieqfa b’mod maestuż fil-qalba tal-Belt Valletta, il-Berġa ta’ Kastilja hija waħda mill-ewwel binjiet li nbnew fil-belt il-ġdida wara l-Assedju l-Kbir. Inbniet fl-1574 fuq disinn tal-arkitett Ġlormu Cassar, iżda l-forma li nafuha llum hija frott xogħlijiet estensivi li saru fis-seklu 18 taħt il-Gran Mastru Pinto.
Kien proprju l-perit Andrea Belli li ħoloq wieħed mill-aktar elementi distintivi tal-binja – it-taraġ monumentali b’żewġ naħat li sal-lum jilqa’ lill-mexxejja politiċi, dinjitarji barranin u viżitaturi li jidħlu fil-berġa.
Fost l-aktar dettalji interessanti hemm il-fatt li qabel ma Kastilja saret ċentru amministrattiv, kien hemm diversi pjanijiet differenti għall-użu tagħha. F’perjodu minnhom kien saħansitra ġie kkunsidrat li sservi bħala sede tal-Parlament Malti, għalkemm dawn il-pjanijiet qatt ma twettqu.
Matul iż-żmien, il-binja għaddiet minn diversi kapitli storiċi. Taħt il-Franċiżi ntużat bħala kwartieri militari, filwaqt li matul il-ħakma Ingliża saret il-kwartieri ewlenin tal-armata Brittanika f’Malta.
Mill-1972 ’l hawn, Kastilja saret uffiċjalment il-post tax-xogħol tal-Prim Ministru. Kien Dom Mintoff l-ewwel Prim Ministru li mexxa l-ħidma tiegħu minn din il-binja storika, li minn dak iż-żmien ’l hawn baqgħet il-qalba tal-amministrazzjoni tal-pajjiż.
Fuq barra tal-binja għadhom jispikkaw iż-żewġ kanuni storiċi li għal snin twal saru simbolu ta’ Kastilja. Dawn riċentement għaddew minn proġett ta’ restawr minn Heritage Malta sabiex jibqgħu parti mill-wirt storiku tal-kapitali.
Il-Berġa ta’ Kastilja ġarrbet ukoll diversi sfidi matul is-sekli, fosthom ħsarat fit-terremot qawwi tal-1693 u danni matul it-Tieni Gwerra Dinjija, iżda minkejja kollox baqgħet wieqfa bħala simbolu tal-istorja u l-governanza Maltija.
Il-famuż taraġ ta’ Andrea Belli jibqa’ xhud sieket ta’ aktar minn erba’ sekli ta’ storja, politika u bidliet li sawru lil Malta kif nafuha llum.
Facebook / Melvic Zammit
