Raġel identifikat bħala Rich Gallion qed jagħmel appell pubbliku bit-tama li jerġa’ jsib pen pal Maltija li magħha kien jikkorrispondi matul is-snin tmenin. F'post li qasam fuq il-midja soċjali, Rich spjega li kien ilu snin jiskambja ittri ma' mara jisimha Catherine, li dak iż-żmien kienet tgħix il-Belt Valletta. Madankollu, minħabba li għaddew ħafna snin u għamel diversi bidliet ta' residenza, spiċċa tilef l-ittri u l-envelopes li seta' kienu jgħinuh jiftakar kunjomha jew isibha.
"L-isem tagħha kien Catherine u kienet tgħix il-Belt Valletta dak iż-żmien. Sfortunatament ma niftakarx kunjomha għax l-ittri u l-envelopes intilfu matul is-snin u wara l-ħafna ċaqliq li għamilt," kiteb Rich. Minkejja dan, huwa qal li żamm żewġ ritratti li Catherine kienet bagħtitlu matul dak il-perjodu, u qed jittama li dawn jistgħu jgħinu lil xi ħadd jagħrafha.
Huwa żied li, jekk il-memorja tiegħu mhix qed tqarraq bih, it-tfajla żagħżugħa li tidher maġenb Catherine fir-ritratti x'aktarx kienet in-neputija tagħha. Rich temm il-messaġġ tiegħu b'appell sempliċi iżda sinċier, fejn talab lil kull min jista' jkollu xi informazzjoni biex jgħinu jerġa' jagħmel kuntatt ma' Catherine wara aktar minn erba' deċennji.
"L-għajnuna tagħkom tkun apprezzata ħafna," qal Rich, bit-tama li l-qawwa tal-midja soċjali twasslu biex jerġa' jiltaqa' ma' ħabiba antika.
Facebook / Rich Gallion
