Permezz ta’ kitba fuq il-paġna tagħhom, Maltese Islands Weather qasmu mas-segwaċi ftit informazzjoni dwar dak li għandna nistennew mit-temp fiż-żmien li ġej.
Huma qalu, “Meta ppubblikajna dan l-aġġornament fit-22 ta’ Awwissu, konna l-uniku sit lokali tat-temp li semmejna l-possibbiltà ta’ bidla lejn temp aktar instabbli madwar nofs Settembru. Kważi tliet ġimgħat wara, is-sinjali issa huma ferm aktar ċari: perjodu ta’ instabbiltà fil-Mediterran Ċentrali bejn wieħed u ieħor bejn it-12 u d-19 ta’ Settembru issa jidher dejjem aktar probabbli, bil-possibbiltà ta’ xita u maltempati bir-ragħad li terġa’ tidħol fl-istampa għall-Gżejjer Maltin.”
Żiedu, “Naturalment, għadu kmieni wisq biex niddeterminaw liema ġurnata, f’liema ħin u kemm se tagħmel xita - dettalji bħal dawn jiddependu ħafna mill-pożizzjoni eżatta tas-sistemi atmosferiċi. Imma hemm punt li xtaqna naqsmu magħkom: dan huwa proprju l-perjodu li konna ġbidna l-attenzjoni lejh sa mit-22 ta’ Awwissu, meta konna waħedna qed nitkellmu dwaru. Issa nkomplu nsegwuh jum b’jum.”
