Ingrid Sammut fetħet qalbha f’messaġġ personali dwar ir-realtà diffiċli li qed tgħix wara l-kanċer u t-trattamenti li għaddiet minnhom, hekk kif għamlet sejħa pubblika bit-tama li ssib speċjalisti li jistgħu jgħinuha. Wara perjodu ’l bogħod minn Facebook, Ingrid qalet li qed tgħix b’uġigħ newropatiku qawwi u kontinwu, problemi serji fil-funzjoni ta’ sieqha, nuqqas ta’ rqad u bidliet ormonali wara l-kimoterapija u mediċini oħra.
Hija spjegat li tilfet ħafna mill-indipendenza u minn dak li kien jifforma parti importanti mill-identità tagħha, fosthom l-isport, iż-żfin u l-karriera. Tkellmet ukoll dwar telf sostanzjali fil-piż, minn madwar 63 kilogramma fi tmiem il-kimoterapija għal 53 kilogramma llum. Għal Ingrid, is-sopravivenza mill-kanċer ma tistax tkun l-uniku kejl ta’ riżultat pożittiv. “Irrid il-kwalità tal-ħajja tiegħi lura,” saħqet.
F’parti emozzjonali tal-messaġġ, hija tkellmet dwar kemm qed issibha diffiċli tkompli tgħix b’dan il-livell ta’ wġigħ u limitazzjonijiet jekk il-kundizzjoni tagħha kellha tibqa’ permanenti. Fl-istess waqt għamlitha ċara li l-post tagħha mhuwiex nota ta’ suwiċidju, iżda sejħa konkreta għall-għajnuna.
Ingrid qed tfittex kuntatt ma’ newroloġisti, kirurgi speċjalizzati fin-nervituri periferali, esperti newromuskolari, speċjalisti fir-riabilitazzjoni, endokrinologi jew ċentri ta’ riċerka li jistgħu jevalwaw il-każ kumpless tagħha. Hija tinsab lesta wkoll tivvjaġġa kullimkien jekk dan jista’ jiftħilha possibbiltajiet ġodda.
“Għandi bżonn lil xi ħadd li jaf lil xi ħadd,” kitbet, filwaqt li talbet għal isem ta’ speċjalista, programm ta’ riċerka, sptar, trattament jew sempliċement bieb li għadha ma ħabbitx fuqu. Wara l-ġlieda tagħha kontra l-kanċer, il-messaġġ ta’ Ingrid huwa wieħed ċar: “Ma rridx inkun sempliċement ħajja. Irrid ngħix. U ngħix b’mod sinifikanti.”
L-appell tagħha huwa biex kull min jista’ jkollu kuntatt jew informazzjoni li tista’ twassalha għand l-esperti t-tajba jgħinha tesplora kull possibbiltà biex terġa’ tikseb kemm jista’ jkun mill-indipendenza u l-kwalità tal-ħajja tagħha.
Facebook / Ingrid Vella
