Tim lokali mill-Malta Weightlifting Association kiseb riżultati mill-aqwa fil-London Open, li sar f’Crystal Palace, fejn l-atleti Maltin kisbu diversi postijiet fuq il-podju u waqqfu wkoll rekords nazzjonali ġodda.

Fl-ewwel kompetizzjoni, Kim Camilleri Lagana u Aaliyah Gatt taw wirja impressjonanti. Camilleri Lagana rebħet il-midalja tad-deheb b’total ta’ 159kg, filwaqt li Gatt kisbet il-midalja tal-bronż b’total ta’ 155kg.

Fil-kompetizzjoni ta’ wara, Nathaniel Fenech żied midalja oħra għall-Malta meta kiseb il-bronż b’total ta’ 216kg. Luke Stefan Micallef imbagħad offra prestazzjoni eċċezzjonali, fejn temm is-sitt lifts kollha (6/6) u rebaħ id-deheb b’total ta’ 207kg.

Barra minn hekk, Micallef waqqaf rekords nazzjonali ġodda fil-kategorija tal-65kg, kemm fil-Clean and Jerk b’118kg kif ukoll fit-total.

Fl-aħħar kompetizzjoni, l-iżgħar atleta fit-tim Malti, Nathan Mifsud, wera maturità u saħħa kbira. Huwa temm is-sitt lifts kollha (6/6) u rebaħ id-deheb b’total ta’ 201kg.

Sfortunatament, Rylee Borg u Tenishia Thornton kellhom jirtiraw mill-kompetizzjoni hekk kif għadhom qed jirkupraw minn inury.

Il-Malta Weightlifting Association tixtieq tesprimi r-ringrazzjament sinċier tagħha lill-Kumitat Olimpiku Malti u lil SportMalta għall-appoġġ kontinwu tagħhom, li kien kruċjali għas-suċċess ta’ din il-kompetizzjoni.