Ġimgħa biss wara li laqgħu lil binthom fid-dinja, Keith Panelli u martu Yasmin Helledie qed jaqsmu mument intimu u profond li laqat qalb ħafna ġenituri: l-esperjenza tas-skin-to-skin ma’ binthom ċkejkna, Minna.
F’post emozzjonanti fuq il-midja soċjali, Keith iddeskriva kif xejn ma seta’ jħejjih għal dak li jħoss meta jżomm lil bintu fuq sidru. Il-ħoss ta’ qalbha żgħira, is-sħana ta’ ġisimha u l-fatt li jkunu tant viċin, saru mumenti ta’ paċi u konnessjoni li diffiċli tpoġġih fi kliem.
Keith jispjega li dan il-ġest sempliċi jagħmel aktar milli wieħed jimmaġina. Is-skin-to-skin jgħin biex jikkalma d-dinja żgħira tat-tarbija, itejjeb in-nifs tagħha, iżommha sħuna, jibbilanċja r-rata tal-qalb, isaħħaħ is-sistema immunitarja u jgħinha torqod aħjar u aktar fil-fond. Benefiċċji li mhux biss jaffettwaw lit-tarbija, imma wkoll lill-ġenituri li qed jibnu rabta ġdida u unika.
Għal Keith u Yasmin, dawn il-mumenti mhumiex biss parti mir-rutina tal-ġranet bikrin tal-ġenituri, imma esperjenza ta’ bonding fuq livell ieħor. Rabta li qed tinbena bil-mod, b’ħlewwa u bi mħabba, u li se tibqa’ magħhom għal ħajjithom kollha.
Il-wasla ta’ Minna mhux biss bidlet ħajjithom, iżda fetħet kapitlu ġdid mimli emozzjonijiet, skoperti u mumenti żgħar li jfissru kollox. U jekk hemm ħaġa waħda li dan il-messaġġ ifakkarna fiha, hija li kultant l-aktar affarijiet sempliċi huma dawk li jħallu l-akbar impatt.
Instagram / Keith Panelli
