Illum qed tiċċelebra għeluq sninha l-kantanta Maltija Maria Bellia, artista li matul dawn l-aħħar snin irnexxielha tibni identità mużikali differenti u awtentika fix-xena lokali.
Riċentament rajna lil Maria tieħu sehem fil-festival Mużika Mużika bil-kanzunetta Hey Siri, fejn għal darb’oħra spikkat bl-istil partikolari tagħha u bil-mod oriġinali kif twassal il-mużika tagħha.
Mhux l-ewwel darba li Maria ħalliet impatt fuq il-pubbliku Malti. Ħafna jiftakruha wkoll fil-festival L-Għanja tal-Poplu bil-kanzunetti Nann u Ismi. Fil-fatt, Ismi kienet kisbet it-tieni post fil-kompetizzjoni, filwaqt li Maria rebħet ukoll il-premju prestiġjuż tal-aqwa kantawtriċi ta’ dik l-edizzjoni.
Matul is-snin rajnieha wkoll tipprova xortiha fuq X Factor, fejn minkejja li qatt ma waslet sal-live shows, ħafna telespettaturi baqgħu jiftakru l-auditions tagħha, speċjalment meta tat interpretazzjoni ġdida u friska ta’ kanzunetti klassiċi Maltin. Għal ħafna, dik kienet bidla milqugħa ħafna li wriet kemm Maria kapaċi tagħti ħajja ġdida lill-mużika tradizzjonali Maltija.
Illum, f’jum għeluq sninha, ħafna qed jingħaqdu biex jawgurawlha aktar suċċess fil-karriera artistika tagħha u biex tkompli tagħti l-kontribut uniku tagħha lill-mużika Maltija.
Facebook / Marija Bellia
