Hekk kif ġie irrappurtat fl-aħbarijiet nhar l-Erbgħa 11 ta’ Frar 2026, nirien qawwija ħakmu garaxx fi Triq Valley, Birkirkara – inċident li ħalla konsegwenzi kbar fuq tliet familji li kienu jgħixu propju fuq dan il-garaxx.
Id-djar tagħhom spiċċaw f’kundizzjoni fejn ma jistgħux jintużaw. Il-ħitan saru suwed bid-dħaħen, it-twieqi tkissru, u r-ragħwa tal-pumpieri għattiet dak li ftit sigħat qabel kien spazju mimli ħajja u memorji. Sabiex jiġbru xi affarijiet li setgħu jsalvaw, il-familji kellhom jidħlu fid-dar akkumpanjati mill-Pulizija.
Fortunatament, ħadd ma weġġa’ u l-familji jinsabu kollha siguri. Madankollu, tilfu kważi kollox: għamara, ħwejjeġ, oġġetti personali u memorji ta’ ħajja sħiħa. Quddiemhom issa hemm triq twila ta’ bini mill-ġdid.
Priscilla Spiteri nediet ġbir ta’ fondi sabiex tgħin lil dawn il-familji jerġgħu jqumu fuq saqajhom. Kull donazzjoni, kbira jew żgħira, se tmur direttament biex tgħinhom jibdew mill-ġdid u jirrestawraw djarhom.
Min jista’ jikkontribwixxi huwa mħeġġeġ sabiex jagħmel dan. Min ma jistax, jista’ xorta jgħin billi jaqsam dan l-appell.
Facebook/ Priscilla Spiteri
