Diversi ħbieb u membri tal-komunità ta’ Ħal Qormi qamu dalgħodu għal aħbar li ħasdet lil kulħadd, hekk kif ġie kkonfermat li Jurgen Cassar, raġel ta’ 40 sena magħruf bħala “tal-Fieres”, tilef ħajtu f’inċident traġiku waqt ix-xogħol tiegħu.
L-inċident seħħ għall-ħabta tas-6:00, meta Cassar allegatament inqabad fil-makkinarju ta’ trakk tal-ġbir tal-iskart. Minkejja l-intervent immedjat tas-servizzi tal-emerġenza, sfortunatament huwa ġie ċċertifikat mejjet fuq il-post.
Fi stqarrija, il-Pulizija spjegaw kif fuq il-post issejħu diversi uffiċjali u timijiet ta’ assistenza, inklużi membri tal-Protezzjoni Ċivili u uffiċjali tal-Forensika li assistu fl-investigazzjoni inizjali tal-każ.
Il-Maġistrat Monica Borg Galea ġiet infurmata b’dan l-inċident u ħatret inkjesta biex jiġu stabbiliti ċ-ċirkustanzi kollha li wasslu għal din it-traġedja.
Cassar kien ilu snin twal jaħdem f’dan il-qasam, u kien magħruf sew fil-lokalità. Il-mewt tiegħu ħalliet vojt kbir fil-komunità Qormija, b’ħafna jesprimu s-sogħba tagħhom u jiftakru fih bħala persuna dedikata u ħabrieka.
Aktar dettalji mistennija joħorġu fil-ħin li ġej hekk kif l-investigazzjonijiet għadhom għaddejjin.
Facebook / Jurgen Fieres Cassar
