Dawk kollha li jħobbu l-futbol se jkollhom opportunità rari li jersqu aktar lejn il-wirt ta’ Diego Armando Maradona, hekk kif Napoli Club Malta se jorganizza esebizzjoni speċjali bit-titlu A Tribute to a Legend – Maradona.
L-esebizzjoni se ssir is-Sibt 4 ta’ Lulju 2026 fil-binja tan-Napoli Club Malta bejn l-10:00 u t-18:00. Id-dħul se jkun bla ħlas, għalkemm il-pubbliku se jkun jista’ jagħmel donazzjoni volontarja, bil-fondi kollha miġbura jmorru b’risq Puttinu Cares.
Għall-ewwel darba f’Malta, il-viżitaturi se jkollhom l-opportunità jaraw kollezzjoni rari ta’ memorabilia oriġinali ta’ Maradona, li ġejja mill-kollezzjoni privata tal-familja Vignati u se tkun irrappreżentata minn Massimo Vignati.
Il-familja Vignati kellha rabta mill-qrib ma’ Maradona matul is-seba’ snin li qatta’ jilgħab ma’ Napoli, b’relazzjoni speċjali li żviluppat mal-familja tal-leġġenda Arġentina matul dak il-perjodu.
Fost l-oġġetti esebiti se jkun hemm qomos tal-logħob, tracksuits, żraben u diversi oġġetti personali oħra li kienu jappartjenu lil Maradona. Kull biċċa memorabilia ġġorr magħha storja unika li tagħti ħarsa aktar mill-qrib lejn il-karriera u l-ħajja tiegħu.
Dawk li jattendu se jkollhom ukoll l-opportunità jiltaqgħu ma’ Massimo Vignati, li se jaqsam tifkiriet u stejjer personali dwar Maradona. Dawn se jiffokaw mhux biss fuq il-futbol, iżda wkoll fuq il-karattru tiegħu bħala persuna, inklużi atti ta’ ġenerożità u karità li kien iwettaq mingħajr ħafna pubbliċità.
Minbarra l-kollezzjoni ddedikata lil Maradona, l-esebizzjoni se tinkludi wkoll sezzjoni speċjali dwar l-istorja tal-futbol Malti, kif ukoll memorabilia internazzjonali relatata ma’ timijiet u plejers magħrufa madwar id-dinja, fosthom l-Arġentina u Lionel Messi.
L-organizzaturi qed jiddeskrivu dan l-avveniment bħala opportunità unika għall-pubbliku biex japprezza aktar il-wirt ta’ wieħed mill-akbar plejers fl-istorja tal-futbol, filwaqt li jikkontribwixxi għal kawża nobbli li tgħin bosta familji Maltin.
