Il-kantawtriċi tal-kanzunetti Sarah Bonnici ilbieraħ tat bidu għal kapitlu ġdid fil-karriera artistika tagħha meta ppreżentat għall-ewwel darba l-album viżiv tant mistenni tagħha, something i had to lose, waqt premiere speċjali fit-Teatru Manoel.
Dan il-proġett, li huwa meqjus bħala l-aktar wieħed personali u vulnerabbli tagħha sal-lum, jgħaqqad il-mużika, l-istejjer u elementi viżivi f’narrattiva waħda li tesplora temi bħall-vulnerabbiltà, il-fejqan, l-identità u l-kuraġġ li wieħed jgħix b’mod awtentiku. Il-viżiv album inħoloq tul sena sħiħa u jirrappreżenta fażi ġdida fl-evoluzzjoni artistika ta’ Bonnici.
Is-serata bdiet bi projezzjoni tal-album viżiv, li mexxa lill-udjenza f’vjaġġ emozzjonali permezz tal-kanzunetti u l-viżwali tiegħu. Iżda meta deher li kollox kien wasal fi tmiemu, l-udjenza ngħatat sorpriża oħra.
Sarah Bonnici dehret live fuq il-palk flimkien ma’ orkestra u interpretat il-kanzunetta bonus My Own Muse. It-tranżizzjoni bla waqfien mill-film għall-esibizzjoni live ħolqot esperjenza unika li għaqqdet iċ-ċinema u l-mużika f’mument wieħed emozzjonanti.
Din l-esibizzjoni ġiet miġbuda waqt il-premiere u se tkun inkluża fil-verżjoni finali tal-viżiv album, li se tkun disponibbli esklussivament fuq vinyl. B’dan il-mod, il-produzzjoni se żżomm l-awtentiċità tal-mument u r-rabta li nħolqot mal-udjenza preżenti matul din il-lejla speċjali.
Wara l-esibizzjoni, Bonnici indirizzat lill-pubbliku fejn irringrazzjat lil dawk kollha preżenti talli qasmu magħha din l-esperjenza. Hija tkellmet ukoll dwar il-vjaġġ personali wara dan il-proġett u kif għall-ewwel darba ħalliet warajha l-biża’ mill-ġudizzju ta’ ħaddieħor biex toħloq mużika li tirrifletti tassew min hi.
"Mhux bilfors il-mużika tiegħi se togħġob lil kulħadd, iżda din hija l-ewwel darba li waqaft ninkwieta dwar x’jaħsbu n-nies. Minflok ktibt mużika li hija kompletament vera għal min jien, mużika li ġejja direttament mir-ruħ. Nemmen li meta tħalli lilek innifsek tkun l-aktar verżjoni awtentika tiegħek, hemmhekk tassew toħloq konnessjoni man-nies."
L-udjenza laqgħet il-prestazzjoni b’standing ovation, li tat tmiem memorabbli għall-premiere ta’ something i had to lose. L-album diġà jinsab disponibbli fuq il-pjattaformi ewlenin tal-istreaming, filwaqt li l-verżjoni sħiħa tal-viżiv album mistennija toħroġ għall-pubbliku fil-ġimgħat li ġejjin, biex aktar nies madwar id-dinja jkunu jistgħu jesperjenzaw dan il-proġett fl-intier tiegħu.
