Luke, ir-rebbieħ tal-aħħar staġun ta' Love Island Malta, fi tmiem il-ġimgħa ċċelebra għeluq id-29 sena tiegħu, u f'din l-okkażjoni speċjali ommu, Rita Grima, qasmet messaġġ emozzjonanti li fih fissret kemm hi kburija bih u kemm jibqa' ispirazzjoni għaliha. Fost kliem mimli mħabba, Rita kitbet li dan mhux biss għeluq snin ieħor, iżda kapitlu ġdid fil-ħajja ta' binha, li, skont hi, "ikompli jispirani."
Hija qalet li Luke għallimha li s-saħħa vera ma tinsabx f'min ikun l-aktar storbjuż, iżda f'qalb tajba, f'kunfidenza kwieta u fil-kuraġġ li wieħed jibqa' dejjem leali lejn min hu tassew. Rita rrakkuntat kif, bħala omm, rat lil binha jaffaċċja kemm il-mumenti sbieħ kif ukoll dawk diffiċli tal-ħajja b'reżiljenza, umiltà u kompassjoni. Żiedet li Luke jfakkarha kuljum li l-karattru dejjem jiddi aktar mill-popolarità u li l-veru kejl ta' persuna jinsab fil-mod kif iġġiegħel lill-oħrajn iħossuhom.
Fil-messaġġ tagħha, awguratlu biex qatt ma jieqaf jemmen fih innifsu, jipproteġi l-paċi tiegħu, isegwi dak li jimlieh bil-ferħ, iħobb b'qalbu kollha, jidħak ta' spiss u qatt ma jitlef il-qalb tajba li, skontha, tagħmlu dak li hu. Hija esprimiet ukoll ix-xewqa li s-sena li ġejja ġġib miegħha avventuri ġodda, opportunitajiet sinifikanti, memorji li jibqgħu miegħu għal dejjem u nies li jaraw il-valur tiegħu bl-istess mod kif tarah hi.
Rita għalqet il-messaġġ tagħha billi sejħet lil Luke "l-akbar barka" u "l-akbar għalliem" tagħha, filwaqt li sostniet li hu dejjem se jibqa' biċċa minn qalbha. Temmet billi awguratlu għeluq snin mill-isbaħ u fakkritu kemm tħobbu, "sal-qamar u lura, u saħansitra aktar."
Minn naħa tagħna, ningħaqdu mal-awguri u nawguraw lil Luke għeluq snin hieni, mimli saħħa, ferħ u suċċess fis-sena li ġejja.
Facebook / Luke Vella Grima
