Dak li seta’ kien sempliċiment festin ta’ għeluq snin inbidel f’okkażjoni ta’ solidarjetà u ġenerożità, hekk kif waqt iċ-ċelebrazzjoni ta’ għeluq snin Sebastian Debono, wieħed mid-Diretturi ta’ Maypole, inġabret is-somma sabiħa ta’ €12,000 b’risq il-Fondazzjoni Richmond.
Qabel iċ-ċelebrazzjoni, Sebastian għamel talba speċjali lill-mistednin tiegħu, minflok rigali għal għeluq sninu, xtaq li jagħtu donazzjoni lill-Fondazzjoni Richmond u b’hekk jgħinu lil dawk li jagħmlu użu mis-servizzi tagħha.
Il-mistednin laqgħu din ix-xewqa b’ġenerożità kbira u, bis-saħħa tal-kontribuzzjonijiet tagħhom, inġabru €12,000. Is-somma ngħatat direttament lill-Fondazzjoni Richmond biex tkompli tappoġġja l-ħidma importanti li twettaq u tagħmel differenza pożittiva fil-ħajja ta’ diversi persuni.
Maypole rringrazzjat lil kull min attenda u kkontribwixxa għal din l-inizjattiva, li wasslet biex jum speċjali għal Sebastian sar ukoll jum li se jħalli impatt pożittiv fuq il-ħajja ta’ ħaddieħor. Ġest tassew sabiħ li juri kif okkażjoni personali tista’ tinbidel f’opportunità biex wieħed jaħseb f’ħaddieħor u jagħti lura lill-komunità.
Facebook / Sebastian Debono
