Il-kunċert annwali Strummin’ se jirritorna fis-6 u s-7 ta’ Novembru li ġej fl-Awditorju ta’ Sant’Agata, ir-Rabat, b’edizzjoni ġdida bit-tema Riot and Rhythm. Strummin’, li ilu jittella’ mill-2002, matul is-snin sar appuntament regolari fil-kalendarju mużikali Malti. Il-kunċert jiġbor flimkien kitarristi, kantanti u mużiċisti b’livelli differenti ta’ esperjenza, flimkien ma’ tim ta’ voluntiera, għal spettaklu li jgħaqqad kanzunetti rock ma’ klassiċi magħrufa.
It-tema magħżula għal din is-sena, Riot and Rhythm, se twassal magħha repertorju b’messaġġ qawwi. Il-kanzunetti magħżula se jmissu temi bħall-inġustizzji, ix-xewqa għall-bidla u t-tama għal soċjetà aħjar, kollha akkumpanjati mill-enerġija tal-mużika live u l-ħoss distint tal-kitarri li Strummin’ huwa magħruf għalih.
Din is-sena, il-benefiċjarja tal-kunċert se tkun il-Malta Guide Dogs Foundation, organizzazzjoni mhux governattiva li tipprovdi klieb gwida mħarrġa professjonalment, mingħajr ħlas, lil persuni għomja jew neqsin mid-dawl f’Malta u Għawdex. Kull kelb jgħaddi minn diversi xhur ta’ taħriġ intensiv qabel ma jingħaqad mal-persuna li jkun se jassisti. Il-Fondazzjoni tibqa’ wkoll toffri taħriġ u appoġġ matul il-ħajja tax-xogħol tal-kelb gwida, li normalment tkun ta’ madwar għaxar snin.
Peress li t-taħriġ u l-akkwist ta’ dawn il-klieb jinvolvu spejjeż sostanzjali, il-Fondazzjoni tiddependi ħafna fuq l-appoġġ tal-pubbliku. Il-fondi miġbura permezz ta’ Strummin’ din is-sena se jgħinuha tkompli tipprovdi dan is-servizz u tagħti aktar indipendenza lil persuni neqsin mid-dawl fil-ħajja tagħhom ta’ kuljum.
It-tim mużikali u l-kitarristi ta’ Strummin’ diġà jinsabu għaddejjin bit-tħejjijiet għall-kunċerti tas-6 u s-7 ta’ Novembru. Aktar dettalji dwar il-biljetti mistennija jitħabbru fuq il-mezzi soċjali ta’ Strummin’ fil-ġimgħat li ġejjin.
