Għaxar snin wara d-dijanjosi tiegħu, Giacomo għandu messaġġ mimli tama għal dawk li bħalissa għaddejjin minn żmien diffiċli. Giacomo Cassar Fenech qasam messaġġ mill-isbaħ u mimli kuraġġ hekk kif għaddew għaxar snin minn kapitlu importanti ħafna f’ħajtu. Meta kellu biss disa’ snin, Giacomo skopra li kellu kanċer. Illum, bħala cancer survivor u student universitarju, għażel li jitkellem dwar l-esperjenza tiegħu bit-tama li jagħti kuraġġ lil oħrajn.
Giacomo jistqarr li mhux soltu jitkellem dwar din il-parti minn ħajtu, fost l-oħrajn għaliex ma jridx li din tiddefinixxih. Madankollu, dan l-anniversarju wasslu biex iħares lura lejn il-vjaġġ tiegħu u jaqsam riflessjoni pożittiva dwar kemm il-ħajja tista’ tinbidel maż-żmien.
Minkejja d-diffikultajiet li għadda minnhom ta’ età tant żgħira, meta jiftakar f’dak il-perjodu Giacomo jgħid li ħafna mill-memorji tiegħu huma marbuta mal-ferħ, id-daħk u n-nies li kien iħobb madwaru. Huwa jirringrazzja lill-familja b’saħħitha tiegħu, kif ukoll lill-infermiera fis-sala fejn kien jingħata l-kura, li dejjem għamlu minn kollox biex iżommu l-ispirtu tiegħu għoli.
Post speċjali ħafna fil-messaġġ tiegħu jmur għal ommu. Giacomo jiddeskriviha bħala mara sabiħa, b’saħħitha, kuraġġuża u mimlija mħabba. Minkejja l-biża’ u l-piż enormi li kellha ġġorr bħala omm, huwa jiftakarha dejjem tħares lejh bi tbissima u tagħtih is-serħan il-moħħ li kollox kien se jgħaddi u jerġa’ jkun sew.
Għaxar snin wara, Giacomo ħares lejn kemm inbidlet ħajtu, minn tifel ta’ disa’ snin li tilef sena skola minħabba dak li kien għaddej minnu, għal żagħżugħ li llum qed jistudja l-università. Huwa proprju minn dan il-vjaġġ li joħroġ il-messaġġ qawwi tiegħu. Giacomo jħeġġeġ lil kulħadd biex japprezza l-mumenti li jkun qed jgħix, għaliex iż-żmien jgħaddi u ċ-ċirkostanzi jinbidlu. Dak li f’mument partikolari jista’ jidher bħala perjodu mudlam u bla tmiem, maż-żmien jista’ jagħti lok għal uħud mill-isbaħ snin ta’ ħajtek.
Fl-aħħar nett, Giacomo kellu kliem ta’ kuraġġ għal kull min bħalissa għaddej minn sfida fiżika, mentali jew sempliċiment minn żmien diffiċli. Huwa ħeġġeġ lil dawn il-persuni biex ma jibżgħux jitkellmu u jfittxu lil xi ħadd li lest jismagħhom. Xi drabi, sostna, mhux soluzzjoni tkun l-aktar ħaġa meħtieġa, iżda qalb tajba u widnejn lesti li jisimgħu.
Storja ta’ kuraġġ, familja, gratitudni u fuq kollox tama. Għaxar snin wara, Giacomo mhux biss qed iħares lura lejn dak li għadda minnu, iżda qed juża l-esperjenza tiegħu biex ifakkar lil oħrajn li ż-żminijiet diffiċli jgħaddu, il-ħajja tinbidel u quddiemna jista’ jkun hemm ħafna aktar sabiħ milli nkunu kapaċi nimmaġinaw.
Facebook / Giacomo Cassar Fenech
