Wara ġimgħat sħaħ ta’ ljieli sħan u umdi, il-lejl li għadda ġab miegħu ftit serħan hekk kif it-temperatura minima f’Malta niżlet taħt il-25°C għall-ewwel darba fi kważi seba’ ġimgħat. Skont It-Temp Madwarna, il-lejl li għadda kien l-aktar wieħed “frisk” wara xejn inqas minn 49 lejl konsekuttiv li matulhom it-temperatura minima baqgħet dejjem ’il fuq minn 25°C.
“Il-lejl li għadda kien l-aktar ‘frisk’ wara xejn anqas minn 49 lejl oppressiv, fejn l-inqas temperatura (il-minima) qatt ma niżlet taħt il-25°C!” kitbu It-Temp Madwarna. Fil-fatt, l-aħħar darba li kienet irreġistrata temperatura taħt il-25°C kienet fil-lejl ta’ bejn il-15 u s-16 ta’ Lulju 2026, meta t-temperatura kienet niżlet għal 24°C.
Matul il-lejl li għadda, it-temperatura minima mkejla kienet ta’ 24.4°C, u b’hekk intemmet sensiela twila ta’ 49 lejl b’temperaturi partikolarment għoljin. Għal ħafna li fl-aħħar ġimgħat sabuha diffiċli jistrieħu minħabba s-sħana persistenti matul il-lejl, din żgur li kienet bidla milqugħa. Jidher li, tal-inqas għal lejl wieħed, stajna finalment inħossu ftit aktar arja friska wara sajf mimli temperaturi għoljin.
