Gillian Attard qasmet messaġġ personali fuq il-mezzi soċjali dwar deċiżjoni li ħadet madwar xahrejn ilu u li, fi kliemha, bidlitilha ħajjitha kompletament. Hija spjegat li wara żmien twil tpoġġi lil kulħadd u kollox qabilha, iddeċidiet li tagħti prijorità lilha nnifisha, lill-paċi tagħha, lit-tkabbir personali u lill-kuntentizza tagħha.
“Għal darba, għażilt lili nnifsi,” kitbet Gillian, filwaqt li fissret kif minn dak il-mument bdiet tħares lejha nfisha b’mod differenti u saħansitra tħobb aktar il-mara li saret. Għal Gillian, l-imħabba lejna nfusna ma tibqax biss xi ħaġa li nħossu minn ġewwa, iżda tibda tidher ukoll fil-mod kif inġorru lilna nfusna, kif nitkellmu ma’ ħaddieħor u kif nidħlu f’kamra. Hija temmen li l-enerġija li ġġib magħha l-aċċettazzjoni tagħna nfusna tinħass ukoll minn dawk ta’ madwarna.
Fil-messaġġ tagħha, Gillian irringrazzjat ukoll lil żewġha għall-appoġġ li dejjem taha tul dan il-vjaġġ, u talli qatt ma talabha tkun xi ħadd differenti minn min hi. Hija esprimiet il-gratitudni tagħha wkoll lejn dawk kollha li jagħżlu li jaqsmu magħha l-mumenti żgħar u kbar tal-ħajja.
Gillian temmet b’messaġġ b’saħħtu għal dawk li forsi jsibuha diffiċli jagħtu prijorità lilhom infushom: “Li tagħżel lilek innifsek mhuwiex egoiżmu. Huwa l-bidu ta’ kull ħaġa oħra.” Messaġġ li jfakkarna fl-importanza li, fost l-impenji u n-nies kollha li nagħtu ħinna għalihom, ma ninsewx nieħdu ħsieb ukoll lilna nfusna.
Facebook / Gillian Attard
