Il-preżentatur u personalità televiżiva Maltija Ben Camille għadda messaġġ ta’ apprezzament lill-għalliema hekk kif riesaq lejn tmiem is-sena skolastika.
F’post fuq Instagram, Ben qasam ritratt tiegħu ma’ wliedu waqt btala fuq il-baħar, flimkien ma’ messaġġ dedikat lill-għalliema. Huwa qal li hemm nies li ma nirringrazzjawhomx biżżejjed, u fost dawn semma propju lill-għalliema.
Ben irringrazzjahom għall-paċenzja, il-kura, l-enerġija u l-għajnuna tagħhom biex it-tfal jikbru u jiżviluppaw. Saħaq ukoll li l-influwenza tal-għalliema tista’ tibqa’ tinħass ħafna wara li t-tfal jitilqu mill-klassi.
"M'intomx sempliċiment tgħallmu l-lezzjonijiet. Qed tibnu l-futur tal-pajjiż," kiteb Ben. Hu jirrikonoxxi li l-għalliema jgħinu wkoll jibnu l-kunfidenza, il-karattru, il-kurżità, il-qalb tajba u l-valuri tat-tfal.
Fil-messaġġ tiegħu, Camille qal li, f’dinja fejn kultant tingħata wisq attenzjoni għal affarijiet inqas bżonnjużi, l-għalliema huma fost dawk li jistħoqqilhom importanza.
Huwa temm billi rringrazzja lill-għalliema kollha għall-kontribut tagħhom u qalilhom: "Grazzi lill-għalliema."
Facebook/ Ben Camille
