Il-Malta Triathlon Federation (MTF) kisbet suċċess notevoli fil-Kampjonati tad-Dinja tat-Triathlon f’Pontevedra, Spanja, bejn l-24 u s-26 ta’ Settembru, fejn Malta kisbet żewġ midalji tal-fidda u diversi riżultati impressjonanti.
Dan wassal lil Malta biex tikklassifika fit-22 post fost 167 federazzjoni affiljata mal-World Triathlon u fit-22 post fost 67 federazzjoni nazzjonali rappreżentata fil-Kampjonati. Dan ir-riżultat ikompli jsaħħaħ il-preżenza ta’ Malta fix-xena internazzjonali tat-triathlon.
Iż-żewġ midalji tal-fidda waslu permezz ta’ Danica Bonello Spiteri, li kisbet it-tieni post fil-kategorija 45-49 Age Group Sprint Distance, u Ryan Muscat, li kiseb il-fidda fil-kategorija 20-24 Age Group Aquabike.
Prestazzjonijiet promettenti waslu wkoll mill-atleti żgħażagħ, b’Liam Daly jispiċċa fir-raba’ post, Zia Fujii fil-ħames post u Aiden Muscat fis-17-il post, kollha fl-ewwel parteċipazzjoni tagħhom f’Kampjonat tad-Dinja tal-Age Group.
Ben Psaila u Julian Villate kkompetew ukoll fl-iSprint Distance, filwaqt li Reuben Zammit temm il-Standard Distance.
Il-MTF faħħret lill-atleti kollha għall-impenn, id-determinazzjoni u l-professjonalità tagħhom, kif ukoll lill-kowċis, il-klabbs u l-komunità li jagħtuhom l-appoġġ.
Il-Federazzjoni se tkompli tinvesti fl-iżvilupp tal-atleti permezz ta’ programmi ta’ prestazzjoni, taħriġ, edukazzjoni teknika u aktar opportunitajiet internazzjonali.
Is-suċċessi f’Pontevedra jikkonfermaw li Malta qed tkompli tagħmel il-preżenza tagħha tispikka fix-xena dinjija tat-triathlon.
