It-Teatru Manoel bħalissa qed jilqa’ l-produzzjoni mużikali Little Shop of Horrors, spettaklu mimli enerġija, umoriżmu u talent li bla dubju qed jagħti esperjenza mill-isbaħ lil dawk kollha li qed jattendu. Il-produzzjoni, li fetħet il-bibien tagħha fi tmiem il-ġimgħa li għaddiet, hija taħlita mill-aqwa ta’ mużika, kummiedja u teatru, b’interpretazzjonijiet li juru l-livell għoli ta’ talent li għandna f’pajjiżna.
Ta’ min jagħmel referenza partikolari għal Michaela Agius u Luigi Buhagiar, li jinterpretaw iż-żewġ rwoli ewlenin u li t-tnejn li huma wasslu interpretazzjonijiet mill-aqwa. Il-preżenza tagħhom fuq il-palk, il-ħila vokali u l-mod kif taw il-ħajja lill-karattri rispettivi tagħhom kienu tassew impressjonanti. It-tnejn irnexxielhom iwasslu kull aspett tal-karattri tagħhom b’mod mill-aktar konvinċenti, b’interpretazzjonijiet li jistgħu jiġu deskritti bħala perfetti.
Naturalment, is-suċċess ta’ produzzjoni bħal din huwa wkoll frott il-ħidma kollettiva ta’ dawk kollha involuti, kemm fuq il-palk kif ukoll wara l-kwinti. Little Shop of Horrors huwa eżempju sabiħ ta’ kemm it-teatru mużikali jista’ jkun divertenti u fl-istess ħin ta’ kwalità għolja.
Jekk kien hemm bżonn ta’ konferma tas-suċċess tal-produzzjoni, din waslet fi tmiem is-serata, meta l-udjenza qamet bilwieqfa biex tagħti standing ovation lill-kast kollu, f’mument mill-isbaħ ta’ apprezzament għat-talent u x-xogħol li rajna fuq il-palk.
Għal dawk li għadhom ma rawhx, l-aħbar it-tajba hija li Little Shop of Horrors se jerġa’ jittella’ fi tmiem il-ġimgħa li ġejja fit-Teatru Manoel.
Produzzjoni li tassew jistħoqqilha l-appoġġ tal-pubbliku u li m’għandhiex tintilef!
