Għaddew tmien snin minn meta Jerome mar jiltaqa’ mal-Mulej, imma għal Kenneth u l-familja tiegħu, il-preżenza tiegħu tibqa’ ħajja, imdawla minn mħabba li ma tmut qatt.
F’messaġġ li qasam fuq il-midja soċjali, Kenneth kiteb b’qalb mimlija mħabba u gratitudni, "Dan ir-ritratt ta’ Jerome ttieħed f’Lulju tal-2013, ftit ġimgħat biss qabel mal-ħajja tagħna nbidlet għal dejjem. Aktar tard f’Diċembru, skoprejna bil-kanċer — battalja li affaċċja b’kuraġġ, u li għaddejna minnha miegħu sakemm mar jiltaqa’ mal-Mulej fis-6 ta’ Ottubru 2017. Għada jagħlaq tmien snin minn dik il-ġurnata."
Kenneth jispjega kif, minkejja s-snin li għaddew, it-tifkira ta’ ibnu tibqa’ qawwija, "Ma jgħaddix jum li ma naħsbux fuqu - nistaqsu x’kien ikun qed jagħmel illum, il-bniedem li kien isir, u l-ferħ li kien jibqa’ jġib f’ħajjitna. Id-dawl tiegħu jibqa’ parti minna: jmmexxina, jispirana, u jfakkarna f’dak li tassew jiswa."
Kenneth u l-familja tiegħu jemmnu li t-tifkira ta’ Jerome mhijiex rabta mal-passat, iżda pont ta’ mħabba li jkompli jgħaqqadhom miegħu u ma’ dak li tgħallmu minnu.
"Aħna ma narawx dan bħala li aħna marbuta mal-passat, iżda bħala li qed inġorru ’l quddiem l-imħabba, it-tagħlim u d-dawl li ħalla warajh. Il-preżenza tiegħu tibqa’ tħabbat mal-qalb tal-familja tagħna – mhux b’mod li jżommna lura, iżda li jżommna mwaħħdin ma’ dak li hu verament importanti."
Matul dawn is-snin, Kenneth jgħid li l-fidi tagħhom f’Ġesù Kristu kienet is-sisien li fuqu sabu s-saħħa u l-paċi li għandhom bżonn biex ikomplu jimxu ’l quddiem.
"Huwa fih li sibna s-saħħa biex nibqgħu mexjin, it-tama biex nibqgħu nemmnu, u l-paċi li tgħaddi kull fehma umana. Meta niftakru f’Jerome, nagħmlu dan b’għożża għal kull mument li kellna miegħu — u b’ċertezza ferrieħa li din mhijiex it-tmiem tal-istorja.”
B’messaġġ mimli tama, Kenneth itemm, "Jum wieħed, bil-grazzja Tiegħu, nerġgħu niltaqgħu - sħaħ, mfejqa u d-dar. Sa dakinhar, se nibqgħu ngħixu b’mod li jġib unur lill-memorja tiegħu: b’imħabba, b’għan, u b’fidi li ma tintemm qatt."
Jerome jibqa’ għal dejjem simbolu ta’ kuraġġ, fidi u mħabba – tfakkira ħajja li l-mewt ma tistax tħassar.
